ភ្នំពេញៈ ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានអំពាវនាវដល់ប្រជាពលរដ្ឋខ្មែរ កុំឲ្យមានការរើសអើងអ្នកដែលស្រឡាញ់ភេទដូចគ្នា ព្រោះពួកគេក៏ជាមនុស្សដែរ។
លោក កែវ រ៉េមី បានថ្លែងក្នុងពិធីបើកសន្និបាតអន្តរជាតិប្រចាំតំបន់អាស៊ី ស្តីពីសិទ្ធិអ្នកស្រឡាញ់ភេទដូចគា្ន ការប្តូរភេទ និងអន្តរភេទ ក្រោមប្រធានបទ “រួមគា្នដើម្បីសេចក្តីស្រឡាញ់” នៅសណ្ឋាគារកាំបូឌីយ៉ាណា ថ្ងៃទី៦ ខែធ្នូ ឆ្នាំ២០១៧ថា “អ្នកស្រឡាញ់ភេទដូចគ្នា ក៏ជាពលរដ្ឋខ្មែរ ដូច្នេះកុំឲ្យមានការរើសអើងគួរទុកឱកាសដល់ពួកគេ”។
ប្រធានគណៈកម្មាធិការសិទ្ធិមនុស្សបន្ថែមថា បញ្ហាប្រឈមរបស់អ្នកស្រឡាញ់ភេទដូចគ្នា គឺទាក់ទងទៅនឹងគ្រួសាររបស់ពួកគេ ដែលមិនអាចទទួលយកបាននូវការស្រឡាញ់ភេទដូចគ្នា។ គ្រួសាររបស់ពួកគេបានប្រើប្រាស់អំពើហិង្សាមកលើរូបរាងកាយ ក៏ព្រោះតែមិនចង់ឃើញកូនខ្លួន មានលក្ខណៈស្រឡាញ់ភេទដូចគ្នា និងបញ្ហាមួយទៀត ទាក់ទងទៅនឹងសង្គម ដោយសារតែច្បាប់របស់កម្ពុជា មិនទាន់មានការទទួលស្គាល់ការស្រលាញ់ភេទដូចគ្នានៅឡើយ។
សូមបញ្ជាក់ថា ទោះបីជាកម្ពុជាមិនទាន់មានច្បាប់ ស្តីពីការទទួលស្គាល់អ្នកស្រឡាញ់ភេទដូចគ្នាក៏ដោយ ប៉ុន្តែបច្ចុប្បន្នសកម្មភាពរៀបអាពាហ៍ពិពាហ៍ ក៏ដូចជាការភ្ជាប់ជាដើម មានយ៉ាងផុសផុល។ តាមរបាយការណ៍ កម្ពុជាសព្វថ្ងៃ មានអ្នកដែលស្រឡាញ់ភេទដូចគ្នា ដែលបានរៀបការរួចមានចំនួន៦០០០គូ៕
