អគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន បានធ្វើការផ្សព្វផ្សាយពីការបើកសាខាមណ្ឌលត្រួតពិនិត្យលក្ខណៈបច្ចេកទេស (ឆៀក) យានជំនិះនៅ ជ្រោយចង្វារ ចាប់ដំណើរការពីថ្ងៃទី២១ ខែធ្នូ ឆ្នាំ២០១៧ ស្អែកនេះតទៅ។
បច្ចុប្បន្ននេះ មណ្ឌលត្រួតពិនិត្យលក្ខណៈបច្ចេកទេស (ឆៀក) យានជំនិះដែលទទួលបន្ទុកដោយក្រុមហ៊ុន Cambodia Motor Vehicle Inspection មាន៤ទីតាំងគិតទាំងទីតាំងថ្មីនេះ ទីតាំងទី១ នៅតាមបណ្តោយផ្លូវ ឯកឧត្តម ជា សុផារ៉ា ទីតាំងទី២ នៅចំការដូង ទីតាំងទី៣ នៅបឹងស្នោរ និងទីតាំងទី៤ នៅតាមបណ្តោយផ្លូវលេខ៦អារ សង្កាត់ជ្រោយចង្វារ។
មណ្ឌលត្រួតពិនិត្យលក្ខណៈបច្ចេកទេសនេះមានទីតាំងស្ថិតនៅតាមបណ្តោយផ្លូវជាតិលេខ៦អារ ជិតស្ពានទី៣ ចូលតាមក្លោងទ្វារធំឧកញ៉ា លី ហួរ ប្រហែល២៥០ម៉ែត្រ នៅខាងស្តាំដៃ។ មណ្ឌលត្រួតពិនិត្យលក្ខណៈបច្ចេកទេសនេះមានបម្រើសេវាឆៀករថយន្តគ្រប់ប្រភេទ អស់លោកអ្នកចំណាយពេលប្រមាណជា២០នាទី ប៉ុណ្ណោះ នឹងទទួលបានទាំងស្ទីកឃ័រ និងវិញ្ញាបនបត្រ ក្នុងពេលតែមួយ។
