ព្រះសីហនុៈ រថយន្តម៉ាក LUXES RX៣០០ បើកបុកម៉ូតូ HONDA C១២៥ ពីក្រោយបណ្តាលឲ្យស្ត្រី២នាក់ ស្លាប់ភ្លាមៗកន្លែងកើតហេតុ កាលពីថ្ងៃអាទិត្យ ១៤រោច ខែមិគសិរ ឆ្នាំរកា ព.ស២៥៦១ ត្រូវនឹងថ្ងៃទី១៧ ខែធ្នូ ឆ្នាំ២០១៧ វេលាម៉ោង១០៖១០នាទី លើផ្លូវជាតិលេខ៤ ចន្លោះគីឡូម៉ែត្រ១៩៣-១៩៤ ស្ថិតនៅក្នុងភូមិអូរចំណារ ឃុំអូរឧកញ៉្ញាហេង ស្រុកព្រៃនប់ ខេត្តព្រះសីហនុ។
សមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ បង្កឡើយដោយរថយន្ត១គ្រឿងម៉ាក LUXES300 ពណ៌ស្ករ ពាក់ស្លាកលេខ ព្រះសីហនុ 2A-6084 អ្នកបើកបរមិនស្គាល់អត្តសញ្ញាណ មានទិសដៅពីភ្នំពេញ ឆ្ពោះមកខេត្តព្រះសីហនុ លុះដល់ចំណុចខាងលើ ក៏បានបុកពីខាងក្រោយម៉ូតូ១គ្រឿងម៉ាក HONDA C១២៥ ពណ៌ខ្មៅ ពាក់ស្លាកលេខ ព្រះសីហនុ 1D-7296 បើកបរដោយឈ្មោះ លាង ទី ភេទស្រី អាយុ២៦ឆ្នាំ មានអ្នករួមដំណើរម្នាក់ឈ្មោះ តក់ ផលលីន ភេទស្រី អាយុ២០ឆ្នាំ អ្នកទាំងពីរមានទីលំនៅភូមិស្រែចាមក្រោម ឃុំអូរជ្រៅ ស្រុកព្រៃនប់ ខេត្តព្រះសីហនុ ដែលមានទិសដៅស្របគ្នា។
ក្នុងករណីគ្រោះថ្នាក់ខាងលើនេះ បណ្ដាលឲ្យស្លាប់មនុស្សចំនួនស្រី២នាក់៖ ទី១-ឈ្មោះ លាង ទី អ្នកបើកបរម៉ូតូ ស្លាប់នៅនឹងកន្លែងកើតហេតុ។ ទី២-ឈ្មោះ តក់ ផលលីន អ្នករួមដំណើរលើម៉ូតូ ស្លាប់នៅនឹងកន្លែងកើតហេតុ សាកសពជនរងគ្រោះទាំងពីរ សមត្ថកិច្ចជំនាញបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។ ចំណែកអ្នកបើកបររថយន្តបង្ករត់គេចបាត់ ក្រោយពេលកើតហេតុ សមត្ថកិច្ចជំនាញកំពុងស្រាវជ្រាវរក។ រីឯវត្ថតាង រថយន្ត និងម៉ូតូ បានយកមករក្សាទុក នៅអធិការដ្ឋាននគរបាលស្រុកព្រៃនប់៕
