√ ចាប់ជនសង្ស័យម្នាក់ ប្រគល់ឲ្យប៉ូលិសស្រះចក ក្រោយធ្វើសកម្មភាពឆក់កាបូបស្រ្តីម្នាក់

អាម៉ាប៉ាប៉ាញ៉ូស

ភ្នំពេញៈ ជនសង្ស័យម្នាក់ ត្រូវបានប្រជាពលរដ្ឋឃាត់ខ្លួនជាក់ស្ដែង បន្ទាប់ពីធ្វើសកម្មភាពឆក់កាបូបស្ពាយពីស្រ្តីម្នាក់ ដែលកំពុងធ្វើដំណើរតាមផ្លូវបានសម្រេច ប៉ុន្តែរត់មិនរួច។ ហេតុការណ៍នេះ កើតឡើងកាលពីវេលាម៉ោង១០ព្រឹកថ្ងៃសៅរ៍ ១២រោច ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៣ ខែមករា ឆ្នាំ២០១៨ នៅចំណុចមុខ ផ្ទះលេខ៣១ ផ្លូវលេខ៧០ ភូមិ២១ សង្កាត់ស្រះចក ខណ្ឌដូនពេញ រាជធានីភ្នំពេញ។ ជនសង្ស័យដែលឃាត់ខ្លួនឈ្មោះ ជា ម៉េងគាង ភេទប្រុស អាយុ១៧ឆ្នាំ មុខរបរសិស្សសាលា ស្នាក់នៅ ផ្ទះលេខ៣Eo ផ្លូវបេតុង ភូមិបុរីភ្នំពេញ សង្កាត់ទឹកថ្លា ខណ្ឌសែនសុខ។ ចំណែកជនរងគ្រោះឈ្មោះ ពុំ ស្រីឡេង ភេទស្រី អាយុ៣៤ឆ្នាំ មុខរបរលក់អីវ៉ាន់នៅផ្សាតូច ស្នាក់នៅផ្ទះលេខ១៩ ផ្លូវលេខ២២៨ ភូមិ៣ សង្កាត់បឹងសាឡាង ខណ្ឌទួលគោក។

បើតាមសំដីរបស់ជនរងគ្រោះ បានប្រាប់ឲ្យដឹងថា មុនពេលកើតហេតុរូបគាត់ចេញពីផ្ទះនៅបឹងសាឡាង ជិះម៉ូតូមួយគ្រឿងម៉ាក ហុងដាសេ១២៥ ពណ៌ខ្មៅ ពាក់ស្លាកលេខភ្នំពេញ1W.2785 គោលបំណង់ទៅកន្លែងលក់អ៊ីវ៉ាន់នៅផ្សារតូច ធ្វើដំណើរតាមបណ្ដាយផ្លូវលេខ៧០ ទិសដៅពីលិចទៅកើត ខណៈមកដល់ចំណុចកើតហេតុ ក៏មានជនសង្ស័យម្នាក់ជិះម៉ូតូមួយគ្រឿងម៉ាកហុងដា សេ១២៥ សេរី២០១៨ ពណ៌ខ្មៅ ពាក់ស្លាកលេខ ភ្នំពេញ ១GS-៣៥៤៣ ជិះមកទន្ទឹមជនរងគ្រោះ ក៏ធ្វើសកម្មភាពឆក់កាបូបពីជនរងគ្រោះបានសម្រេច ភ្លាមនោះជនសង្ស័យក៏បានបត់ម៉ូតូត្រឡប់ក្រោយវិញបម្រុងជិះរត់គេចខ្លួន ប៉ុន្តែជាអកុសល បណ្ដាលឲ្យដួលម៉ូតូ ភ្លាមៗនោះក៏ត្រូវប្រជាពលរដ្ឋចាប់ខ្លួនប្រគល់ជូនសមត្ថកិច្ចប៉ុស្តិ៍ស្រះចកតែម្តង។ បច្ចុប្បន្នជនសង្ស័យខាងលើ រួមនិងវត្ថុតាងត្រូវបាននាំមកឃាត់ខ្លួននៅប៉ុស្តិ៍នគរបាលរដ្ឋបាលស្រះចក ធ្វើការសាកសួរ និងកសាងសំណុំរឿងបញ្ចូនទៅអធិការដ្ឋាននគរបាលខណ្ឌដូនពេញចាត់កាតាមនិតិវិធី៕