ពោធិ៍សាត់ៈ វាពិតជារឿងសំណាងណាស់ ដែលលោកតាវ័យជាង៧០ឆ្នាំម្នាក់ បានរួចផុតជីវិតពីការវាយប្រហារដោយសត្វជ្រូកព្រៃមួយក្បាល ខណៈគ្រាន់តែរងរបួសប៉ុណ្ណោះ។
ហេតុការណ៍ជ្រូកព្រៃវាយប្រហារមកលើលោកតាវ័យចំណាស់ខាងលើនេះ បានកើតឡើងកាលពីវេលាម៉ោង៨៖៣០នាទីព្រឹកថ្ងៃទី១៤ ខែមករា ឆ្នាំ២០១៨ នៅចំណុចអូររំចេក ភូមិសំឡាញ ឃុំក្រពើពីរ ស្រុកវាលវែង ខេត្តពោធិ៍សាត់។
ជនរងគ្រោះឈ្មោះ ប្រាក់ អាន ភេទប្រុស អាយុ៧១ឆ្នាំ ជនជាតិខ្មែរ រស់នៅភូមិឃុំខាងលើ(របួសធ្ងន់)។
បើតាមប្រភពព័ត៌មាន បានឲ្យដឹងថា មុនពេលកើតហេតុ គាត់ទៅធ្វើស្មៅដំឡូងមីនៅចម្ការ ស្រាប់តែឃើញជ្រូកព្រៃដេញគាត់ ហើយគាត់ក៏រត់ទាក់និងវល្លិ៍ដួល ទើបជ្រូកខ្វេះត្រគៀកខាងឆ្វេង១កន្លែង ក្បាល១កន្លែង ដៃឆ្វេង១កន្លែង កំភួនជើងឆ្វេង១កន្លែង បណ្ដាលឲ្យរងរបួសធ្ងន់តែម្ដង សំណាងហើយមិនគ្រោះថ្នាក់ដល់ជីវិត៕
