កំពង់ឆ្នាំងៈ ឈើប្រណីតប្រភេទធ្នង់ចំនួន៤២ដុំ ដឹកតាមរថយន្តរបស់មន្ត្រីយោធាម្នាក់ ត្រូវបានសមត្ថកិច្ចរដ្ឋបាលព្រៃឈើស្រុកទឹកផុស ធ្វើការបង្ក្រាបបានទៀតហើយ ខណៈដែលគេព្យាយាមដឹកឆ្លងកាត់ខេត្តកំពង់ឆ្នាំងនៅពេលយប់ ។
ហេតុការណ៍បង្ក្រាបរថយន្តដឹកឈើខាងលើនេះ បានធ្វើឡើងនៅវេលាម៉ោង៨និង៣០នាទីយប់ថ្ងៃអង្គារ ១៤កើត ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី៣០ ខែមករា ឆ្នាំ២០១៨ម្សិលមិញនៅលើកំណាត់ផ្លូវក្រាលគ្រោះក្រហមមួយកន្លែង ស្ថិតក្នុងភូមិភ្នំតាសាំង ឃុំក្រាំងស្គារ ស្រុកទឹកផុស ខេត្តកំពង់ឆ្នាំង។
សមត្ថកិច្ចផ្នែករដ្ឋបាលព្រៃឈើស្រុកទឹកផុស ដែលស្ថិតក្នុងការបង្ក្រាប បានឲ្យដឹងថា មុនពេលបង្ក្រាបបានរថយន្តដឹកខាងលើនេះ សមត្ថកិច្ចបានទទួលព័ត៌មានជាក់លាក់ និងបានចេញពួនស្ទាក់នៅចំណុចខាងលើ ភ្លាមៗក៏បានឃើញរថយន្តដឹកឈើពីរគ្រឿងមកដល់ ក៏បានដេញតាមជាប់រហូតដល់រថយន្តដឹកឈើបែកកងទៅមុខលែងរួច ខណៈដែលអ្នកបើករថយន្តបានចុះរត់គេចខ្លួនបាត់ដោយទុកចោលរថយន្ត ដែលមានដឹកឈើធ្នងពេញ។
សមត្ថកិច្ច បានឲ្យដឹងថា រថយន្តបង្ក្រាបបាននោះ ម៉ាកហាយឡែនឌ័រ ពាក់ស្លាក់លេខភ្នំពេញ2J-9729 មានដឹកឈើប្រណីតប្រភេទធ្នង់ចំនួន៤២ដុំ ស្មើនិង១.២៩ម៉ែត្រគិប ខណៈរថយន្ត បែកកងក្រោយទៅមុខលែងរួច ។
ក្រោយឃាត់បានរថយន្តដឹកឈើ ភ្លាមៗនោះបានរាយការជូននាយខណ្ឌរដ្ឋបាលព្រៃឈើខេត្តនិងសុំការអនុញ្ញាតនាំយករថយន្តដឹកឈើមកកាន់រដ្ឋបាលព្រៃឈើខេត្តកំពង់ឆ្នាំង រង់ចាំព្រឹកដើម្បីធ្វើការរាស់ និងរាប់ឈើ ដើម្បីក៏សាងឯកសារបញ្ជូនបន្តទៅតុលាការចាត់ការតាមនីតិវិធីផងដែរ។
បើតាមប្រភពពីមន្ត្រីរដ្ឋបាលព្រៃឈើ ដែលស្ថិតក្នុងការបង្ក្រាបបានឲ្យដឹងថា រថយន្តដែលដឹកឈើ ត្រូវបានសមត្ថកិច្ចផ្នែករដ្ឋបាលព្រៃឈើបង្ក្រាបបានខាងលើនេះ វាជារបស់មន្ត្រីយោធាម្នាក់ នៅក្នុងស្រុកទឹកផុស ឈ្មោះ កែវ រ៉ុន ខណៈដែលតែងតែឃើញបើកតាមផ្លូវនេះជារៀងរាល់ថ្ងៃ តែពេលនេះត្រូវបានសមត្ថកិច្ចបង្រ្កាបបានទៀតហើយ ខណៈកាលពីថ្ងៃទី២៩ មករា២០១៨ រថយន្តមួយគ្រឿងរបស់គេ ម៉ាកស៊ីណាមួយគ្រឿង ត្រូវបានក្រឡាប់ធ្លាក់ប្រឡាយអែបផ្លូវជាតិ៥ ធ្លាយចេញសុទ្ធតែឈើប្រណីតប្រភេទធ្នង់ផងដែរ។
ប្រភពដោយឡែកមួយផ្សេងទៀតបានបង្ហើបឲ្យដឹងថា ជារៀងរាលថ្ងៃរថយន្តដឹកឈើគ្រប់ប្រភេទដឹកឆ្លងខេត្តកំពង់ឆ្នាំង ខណៈដែលសមត្ថកិច្ចចម្រុះនៅតាមផ្លូវបណ្តាក់គ្នាដូចខ្យង ប៉ុន្តែកម្រឃើញសមត្ថកិច្ចទាំងអស់នោះឃាត់បាននោះឡើយ៕
