យោងតាមដីកាបង្គាប់ឱ្យនាំខ្លួនរបស់មហាអយ្យការអមតុលាការកំពូល ចុះថ្ងៃទី០៥ ខែកុម្ភៈ ឆ្នាំ២០១៨ បានឱ្យដឹងថា នៅព្រឹកថ្ងៃទី០៩ ខែកុម្ភៈ ឆ្នាំ២០១៨ វេលាម៉ោង ៨:០០ ព្រឹក នេះ តុលាការកំពូលបើកសវនាការជំនុំជម្រះរឿងក្តីលោក អ៊ុំ សំអាន អតីតតំណាងរាស្រ្ត នៃអតីតគណបក្សសង្គ្រោះជាតិ។
សមាសភាពនៃសវនាការនេះមាន ៖ លោក ឃឹម ប៊ុណ្ណ អនុប្រធានតុលាការកំពូល ជាប្រធានក្រុមប្រឹក្សាជំនុំជម្រះ លោក សឹង បញ្ញាវឌ្ឍ លោក យស់ សូខឿន លោក តែ សំអាង លោកស្រី ខៀវ សុខា ជាចៅក្រម និង លោក វ៉េង ប៊ុនធឿន ជាតំណាងមហាអយ្យការ ។
គួរបញ្ជាក់ថា ទាំងសាលាដំបូងរាជធានីភ្នំពេញ និង សាលាឧទ្ធរណ៍ សម្រេចដូចគ្នាផ្តន្ទាទោស លោក អ៊ុ សំអាន ដាក់ ពន្ធនាគារ រយៈពេល ២ឆ្នាំ ៦ខែ និងពិន័យជាប្រាក់ ចំនួន ៤លានរៀល ក្រោមការចោទប្រកាន់ ចំនួនពីរបទល្មើស ដោយរកឃើញថា លោក អ៊ុ សំអាន មានចេតនាបង្កភាពវឹកវរធ្ងន់ធ្ងរ ដល់សន្តិសុខសង្គម និងញុះញង់ ឱ្យមានការរើសអើងជាតិសាសន៍ តាមរយៈការសរសេរ និងអត្ថាធិប្បាយ ពាក់ព័ន្ធផែនទីសន្ធិសញ្ញាព្រំដែន កម្ពុជា វៀតណាម ។
លោក អ៊ុ សំអាន ជាប់ចោទចំនួន២បទល្មើស គឺ បទញុះញង់ ឱ្យប្រព្រឹត្តបទឧក្រិដ្ឋជាអាទិ៍ បង្កភាពវឹកវរធ្ងន់ធ្ងរ ដល់សន្តិសុខសង្គម និងបទញុះញង់ ឱ្យមានការរើសអើង តាមមាត្រា ៤៩៥ និង៤៩៦ នៃក្រមព្រហ្មទណ្ឌ ដែលប្រព្រឹត្តនៅចំណុចរាជធានីភ្នំពេញ និងព្រះរាជាណាចក្រកម្ពុជា កាលពីអំឡុងឆ្នាំ២០១៥ រហូតដល់ ថ្ងៃទី១០ ខែមេសា ឆ្នាំ២០១៦។
ដោយឡែក សំណុំរឿងមួយទៀត សវនាការបណ្តឹងសារទុក្ខរបស់អ្នកស្រីទេព វន្នី សកម្មជនដីធ្លី តំបន់បឹងកក់ លើសំណុំរឿងចោទប្រកាន់ថា បានបង្កហិង្សាលើសន្តិសុខខណ្ឌដូនពេញ។
កាលពីថ្ងៃទី២៣ ខែកុម្ភៈ ឆ្នាំ២០១៧ តុលាការក្រុងភ្នំពេញ បានសម្រេចផ្ដន្ទាទោស អ្នកស្រី ទេព វន្នី ឲ្យជាប់ពន្ធនាគារចំនួន ២ឆ្នាំកន្លះ និងពិន័យប្រាក់បង់ចូលរដ្ឋចំនួន ៥លានរៀល ព្រមទាំងសងជំងឺចិត្តសន្តិសុខពីរនាក់ជាដើមបណ្ដឹង ចំនួន ៩លានរៀល ពីបទហិង្សាដោយចេតនាមានស្ថានទម្ងន់ទោស លើសន្តិសុខសណ្ដាប់ធ្នាប់សាលាខណ្ឌដូនពេញ ដែលអាជ្ញាធរចោទថា បានប្រព្រឹត្តនៅក្បែរផ្ទះលោកនាយករដ្ឋមន្ត្រី ហ៊ុន សែន កាលពីថ្ងៃទី១៣ ខែមីនា ឆ្នាំ២០១៣។
