តាកែវៈ កម្លាំងអធិការដ្ឋាននគរបាលស្រុកត្រាំកក់ បានឃាត់ខ្លួនជនសង្ស័យម្នាក់ ក្នុងចំណោមជនសង្ស័យ២នាក់ ពាក់ព័ន្ធករណីឆបោកម៉ូតូ ថ្ងៃអង្គារ ៦កើត ខែផល្គុន ឆ្នាំរកា នព្វស័ក ព.ស.២៥៦១ ត្រូវថ្ងៃទី២០ ខែកុម្ភៈ ឆ្នាំ២០១៨ វេលាម៉ោង៦ និង៥នាទី នៅភូមិព្រៃស្បាត ឃុំត្រពាំងធំខាងជើង ស្រុកត្រាំកក់ ខេត្តតាកែវ។
ជនសង្ស័យដែលឃាត់ខ្លួនឈ្មោះ វ៉ាន សង្អិម ហៅអ៊ីន ភេទប្រុស អាយុ៣៨ឆ្នាំ រស់នៅភូមិឫស្សីក្រោក ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ និងម្នាក់ទៀតឈ្មោះ សល់ ភេទប្រុស អាយុ៣០ឆ្នាំ មានទីលំនៅមិនពិតប្រាកដ (កំពុងរត់គេចខ្លួន)។
តាមរបាយការណ៍របស់អធិការដ្ឋាននគរបាលស្រុកត្រាំកក់ បានឲ្យដឹងថា កាលពីវេលាខាងលើ ជនសង្ស័យទាំង២នេះ បានមកលេងផ្ទះឈ្មោះ ម៉ម ង៉ែត ភេទស្រី អាយុ៥៧ឆ្នាំ នៅភូមិឃុំកើតហេតុ (ត្រូវជាម្ដាយធម៌)។ ខណៈនោះឈ្មោះ សល់ បានប្រើល្បិចខ្ចីម៉ូតូ១គ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០១៧ ពាក់ស្លាកលេខ ភ្នំពេញ 1GH-6856 ជារបស់ឈ្មោះ ម៉ម ង៉ែត ថាទៅវេរលុយ រួចក៏យកទៅបាត់តែម្ដង ដោយទុកឲ្យឈ្មោះ វ៉ាន សង្អិម នៅអង្គុយលេងនៅផ្ទះជនរងគ្រោះខាងលើ។ ក្រោយបាត់យូរពេក ម្ចាស់ម៉ូតូមានការសង្ស័យ ក៏ប្ដឹងឲ្យសមត្ថកិច្ចឃាត់ខ្លួនឈ្មោះ វ៉ាន សម្អិម ដើម្បីធ្វើការសាកសួរតែម្ដង។
បច្ចុប្បន្ន កម្លាំងជំនាញ កំពុងកសាងសំណុំរឿង ចាត់ការតាមនីតិវិធី និងបន្តស្រាវជ្រាវរកជនសង្ស័យដែលជាបក្ខពួកយកមកផ្តន្ទាទោសតាមច្បាប់៕
