ស្វាយរៀងៈ សំណុំរឿងឃាតកម្ម អ្នករត់តាក់ស៊ីរំលោភសម្លាប់នារីវ័យក្មេង ដែលបម្រើការងារក្នុងការស៊ីណូ ក្រុងបាវិត ត្រូវបានតុលាការខេត្តស្វាយរៀង នារសៀលថ្ងៃ២៦ ខែកុម្ភៈ ឆ្នាំ២០១៨ បានបញ្ចប់ការសួរដេញដោល នៅវេលាម៉ោង៥នឹង១០នាទីល្ងាច ដោយគ្មានវត្តមានលោកមេធាវីក្រុមគ្រួសារជនរងគ្រោះ។
លោកស្រី រឿន ស្រីឡូត ម្តាយនារីរងគ្រោះ បានឲ្យដឹងថា ការសួរដេញដោលផ្ទាល់មាត់នៅពេលបើកសវនាការនោះ គឺគ្មានវត្តមានមេធាវីការពារឲ្យគាត់ទេ ដោយលោកមេធាវីមិនបានទទួលដីកាកោះហៅពីតុលាការ។ ចំណែកខាងជនត្រូវចោទ គឺមានវត្តមានមេធាវីទាំងពីរនាក់ហើយការសួរដេញដោលអស់រយៈពេលជាង៤ម៉ោង គឺមេធាវីការពារក្តីឲ្យជនត្រូវចោទឈ្មោះ ផ្លេក សូនី បានព្យាយាមដោះបន្ទុកឲ្យកូនក្តី ដូច្នេះរយៈពេលជាង៤ម៉ោង គឺមានតែមេធាវីរបស់ជនត្រូវចោទ ផ្លេក សូនី ដេញដោលចោទឆ្លើយគ្នាដាក់បន្ទុក ហើយលោកមេធាវីការពារក្តីរបស់ឈ្មោះ ឆើយ សុជាតិ ខំដាក់បន្ទុករហូតអស់ម៉ោង ដោយក្រុមគ្រួសារនារីរងគ្រោះមកពីខេត្តព្រះវិហារ និងលោកមេធាវីមិនបានចូលឆ្លើយក្នុងពេលបើកសវនាការឡើយ។ ហើយត្រូវលើកយកទៅធ្វើការនៅពេលក្រោយ ដោយពុំទាន់ដាក់កាលបរិច្ឆេទកំណត់នៅពេលណាយទេ ។
បើតាមមន្ត្រីសាលាដំបូងខេត្តស្វាយរៀង បានបង្ហើបឲ្យដឹងថា លោកប្រធានក្រុមប្រឹក្សាចៅក្រុម និងដាក់ពេលបើកសវនាការនៅចុងខែមីនា ឬដើមខែមេសា ឆ្នាំ២០១៨ ខាងមុខនេះ និងចេញដីកាកោះហៅលោកមេធាវីការពារក្តីឲ្យជនរងគ្រោះឲ្យមកចូលរួមក្នុងសវនាការឲ្យខាងតែបាន។ មន្ត្រីដដែល បន្តទៀតថា បើកសវនាការថ្ងៃ២៦ ខែកុម្ភៈ ឆ្នាំ២០១៨ លោកចៅក្រមបានចេញដីកាកោះអញ្ជើញលោកមេធាវី ក៏ដូចជាសាក្សី និងអ្នកពាក់ព័ន្ធទាំងអស់ តាមប្រៃសណីយ៍ ក៏មិនដឹងថា យ៉ាងម៉េចទើបលោកមេធាវីខាងជនរងគ្រោះមិនបានទទួល។ ហើយក៏មានអ្នកសារព័ត៌មានចុះផ្សាយផងដែរ ហើយពេលក្រោយ និងដាក់ពេលបើកសវនាការពេញមួយថ្ងៃតែម្តង ដោយមានសាក្សីដាក់បន្ទុក និងសាក្សីដោះបន្ទុករហូតដល់២១នាក់ឯណោះ ទើបការសួរដេញដោលមិនបានបញ្ចប់ត្រូវលើកពេល។
សូមរំលឹកផងដែរ ក្មេងស្រីឈ្មោះ សុខ សុវណ្ណសុម៉ាលីន អាយុ១៨ឆ្នាំម្នាក់ ដែលជិះរថយន្តតាក់ស៊ី ហើយត្រូវបានបាត់ការទាក់ទងជាមួយក្រុមគ្រួសារ២ថ្ងៃចាប់ពីថ្ងៃទី២ ខែសីហា ដល់ថ្ងៃ៤ ខែសីហា ឆ្នាំ២០១៧ ហើយត្រូវបានក្មេងដើរឃ្វាលក្របីប្រទះឃើញសាកសពអណ្តែតទឹក នៅក្នុងទឹកកែងស្រែស្ថិតក្នុងភូមិតាពៅ សង្កាត់បាវិត ក្រុងបាវិត ខេត្តស្វាយរៀង ដែលជនជាឃាតកដៃដល់ទាំង២នាក់គឺ ទី១- ឈ្មោះ ឆើយ សុជាតិ និងម្នាក់ទៀតឈ្មោះ ផ្លេក សូនី អ្នកទាំង២គឺជាអ្នករត់តាក់ស៊ី ក្នុងចំណតតាក់ស៊ីក្រុងបាវិត ទៅរាជធានីភ្នំពេញ ភ្នំពេញទៅក្រុងបាវិត៕
