កំពង់ចាមៈ កម្លាំងជំនាញគ្រឿងញៀន នៃអធិការដ្ឋាននគរបាលស្រុកកំពង់សៀម សហការជាមួយកម្លាំងជំនាញចរាចរណ៍ស្រុក ចុះត្រួតពិនិត្យរថយន្តតទ្រុងខុសលក្ខណៈបច្ចេកទេស និងត្រួតពិនិត្យអាវុធជាតិផ្ទុះ កាលពីយប់ថ្ងៃទី១១ ខែកុម្ភៈ ឆ្នាំ២០១៨ នៅចំណុចភូមិអំពិលលើ ឃុំអំពិល ស្រុកកំពង់សៀម ខេត្តកំពង់ចាម បានឃាត់ខ្លួនបុរសម្នាក់ ដែលជាអ្នកបើកបររថយន្ត បន្ទាប់ពីសមត្ថកិច្ចបានត្រួតពិនិត្យរថយន្ត១គ្រឿង ដោយរកឃើញមានរក្សាទុក និងផ្ទុកសារធាតុញៀននៅក្នុងខ្លួន។
សមត្ថកិច្ចបានឲ្យដឹងថា ជនសង្ស័យដែលត្រូវឃាត់ខ្លួនមានឈ្មោះ ជុយ ម៉េង ហៅ វ៉ាន់ឌី ភេទប្រុស អាយុ២៧ឆ្នាំ មុខរបរអ្នកបើកបររថយន្ត មានទីលំនៅភូមិជីពែ ឃុំព្រៃក្រី ស្រុកកជល់គិរី ខេត្តកំពង់ឆ្នាំង (បច្ចុប្បន្ន ស្នាក់នៅក្រុងភ្នំពេញ) ត្រួតពិនិត្យក្នុងរថយន្តរកឃើញម្សៅក្រាមពណ៌ស សង្ស័យជាថ្នាំញៀនចំនួន១កញ្ចប់តូច ឧបករណ៍ជក់មួយសម្រាប់ និងទូរស័ព្ទដៃ១គ្រឿង។
សមត្ថកិច្ចបានបញ្ជាក់ទៀតថា មធ្យោបាយធ្វើដំណើររថយន្តម៉ាក ហ៊ីយ៉ាន់ដាយ ពណ៌ក្រហម ពាក់ស្លាកលេខ ភ្នំពេញ 3B-8777 ហើយត្រូវបានឃាត់ទុក កាលពីវេលាម៉ោង១១យប់ ថ្ងៃទី១១ ខែកុម្ភៈ ឆ្នាំ២០១៨ នៅចំណុចភូមិអំពិលលើ ឃុំអំពិល ស្រុកកំពង់សៀម ខេត្តកំពង់ចាម ខណៈកម្លាំងជំនាញដាក់កុងត្រូលត្រួតពិនិត្យរថយន្តតទ្រុងខុសបច្ចេកទេស និងអាវុធជាតិផ្ទុះ។
បច្ចុប្បន្នជនសង្ស័យ រួមនឹងវត្ថុតាង ត្រូវបានកម្លាំងជំនាញរៀបចំសំណុំរឿងបញ្ជូនទៅតុលាការ ដើម្បីចាត់ការបន្តតាមនីតិវិធីច្បាប់៕
