ភ្នំពេញ៖ កាលពីល្ងាចម្សិលមិញ នៅថ្ងៃទី២៧ ខែកុម្ភៈ លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានបង្ហោះខ្លឹមសារនៅលើគណនីហ្វេសប៊ុក របស់លោក ដោយក្នុងន័យឌឺដងចំពោះចំណាត់ការព្រះរាជអាជ្ញារង អមសាលាដំបូង រាជធានីភ្នំពេញ សម្រេចឲ្យបិទទ្វារ ខារ៉ាអូខេ កូឡូសូ (Coloso KTV) ជាបណ្ដោះអាសន្ន បន្ទាប់ពីបែកធ្លាយវីដេអូអាសអាភាសរបស់ភ្ញៀវ។
ក្នុងន័យនេះ លោកចាត់ទុកថាជារឿង ខឹងគោបែរជាទៅវាយរទេះទៅវិញ។ បើទោះបីខ្លឹមសារទាំងមូលរបស់លោករដ្ឋមន្រ្តី គ្មានឃ្លាណា ឬពាក្យណាបង្ហាញឲ្យចំចំពោះករណីនេះក៏ពិតមែន ប៉ុន្តែគេអាចវាយតម្លៃយ៉ាងច្បាស់ថា លោករដ្ឋមន្រ្តី បានសម្ដៅទៅលើបញ្ហាដ៏កក្រើកមួយនេះ។
ខាងក្រោមនេះជាការលើកឡើងរបស់លោក រដ្ឋមន្ត្រី៖
«សូមទោសជាមុនដែលមាត់ខ្ញុំទទួលទានអំបិល ប្រហុក ហេតុនេះចេះតែរពិសមាត់។ យើងតែងប្រាប់ប្រជាជនថា កុំខឹងគោវាយរទេះ ពោលគឺបុគ្គលម្នាក់ធ្វើខុស តែមកស្អប់រាជរដ្ឋាភិបាលនោះមិនត្រូវទេ។ តែដល់ភ្ញៀវធ្វើខុសនៅក្នុងហាង អ្នកខុសអត់មានទោស តែបិទហាងទាំងមូល។ ដំណឹងមិនយើងប្រាប់រាស្ត្រផ្សឹង តែយើងធ្វើផ្សេង?»។
