កាលពីថ្ងៃទី១ ខែកុម្ភៈ ឆ្នាំ២០១៨ ឧកញ៉ាវ័យក្មេង ឡេង ណាវ៉ាត្រា ដែលទើបទទួលបានងារថ្មីៗ បានយកថវិកាផ្ទាល់ខ្លួនចំនួន៥០លានរៀល សុទ្ធតែក្រដាស ៥០០ រៀល ជូនដល់មន្ទីរពេទ្យគន្ធបុប្ផា។
លោកឧកញ៉ា ឡេង ណាវ៉ាត្រា បានប្រាប់ថាគម្រោងនៃការបរិច្ចាគនេះមានទំហំទឹកប្រាក់ដល់ទៅ១៥០លានរៀល ដែល ៥០លានរៀលលោកជូនមន្ទីរពេទ្យគន្ធបុប្ផា និង ១០០លានរៀលសម្រាប់ជូនកាកបាទក្រហមកម្ពុជា ដែលនឹងធ្វើឡើងក្នុងពេលឆាប់ៗខាងមុខ។
អតីតពលករធ្វើការនៅប្រទេសកូរ៉េរូបនេះ បានប្រាប់ពីបំណងនៃការបរិច្ចាគ គឺធ្វើអ្វីៗដើម្បីជួយសង្គម និងសង្គ្រោះជីវិតកុមារក្រីក្រកម្ពុជា ម្យ៉ាងវិញទៀតជីវិតលោកក៏ធ្លាប់ហែលឆ្លងការលំបាក ទើបសម្រេចចិត្តបរិច្ចាគថវិកាផ្ទាល់ខ្លួនដល់ស្ថាប័នមនុស្សធម៌ទាំងពីរខាងលើតាមដែលអាចធ្វើទៅបាន។
សូមបញ្ជាក់ លោកឧកញ៉ារូបនេះ កាលពីថ្មីៗនេះ បានឧបត្ថម្ភប្រាក់១០លានរៀល ដល់សមាគមអតីតពលករខ្មែរមកពីកូរ៉េ។
តាមគម្រោងក្នុងពេលដ៏ខ្លីខាងមុខ លោកឧកញ៉ា ឡេង ណាវ៉ាត្រា នឹងដឹកនាំសិល្បករខ្មែរល្បីៗជាង២០នាក់ទៅសម្តែងសិល្បៈនៅប្រទេសកូរ៉េ ដែលការសម្តែងនេះគ្រោងចំណាយថវិកាដល់ទៅជាង១០ម៉ឺនដុល្លារឯណោះ។
