លោក ជុំ សុន្ទរី អ្នកនាំពាក្យក្រសួងការបរទេស និងកិច្ចសហប្រតិបត្តិការអន្តរជាតិ កម្ពុជា បាននិយាយថា ក្រសួងបានទាក់ទងទៅទូតអូស្ត្រាលីប្រចាំនៅកម្ពុជា ដើម្បីដោះស្រាយបញ្ហារឿងដុតរូបទីងមោងសម្ដេច ហ៊ុន សែន តាមផ្លូវការទូតហើយ មុននឹងមានវិធានការបន្តទៀត។
អ្នកនាំពាក្យរូបនេះបានបញ្ជាក់ដូច្នេះថា៖ បញ្ហានេះក្រសួងការបរទេសកំពុងតាមដានយ៉ាងយកចិត្តទុកដាក់ចំពោះសភាពការណ៍នៅអូស្ត្រាលី ខ្ញុំមិនទាន់មានអ្វីច្រើនដែលអាចជម្រាបបានទេ នូវអ្វីដែលក្រសួងកំពុងតែធ្វើតាមច្រកការទូត ពីព្រោះអ្វីដែលយើងកំពុងធ្វើការងារតាមការទូត គឺយើងមិនអាចយកទៅផ្សព្វផ្សាយតាមប្រព័ន្ធឃោសនាបានទេតែយើងកំពុងតាមដាន និងសម្របសម្រួលតាមច្រកការទូត។
ទាក់ទងនឹងបញ្ហានេះដែរ លោក ខៀវ សុភ័គ អ្នកនាំពាក្យក្រសួងមហាផ្ទៃ បានថ្កោលទោសចំពោះសកម្មភាពប្រមាថរដ្ឋាភិបាល តាមរយៈដុតរូបទីងមោងនេះ លោកចាត់ទុកទង្វើបែបនេះថាជារឿងគ្មានក្រមសីលធម៌ ដែលពលរដ្ឋខ្មែរទាំងនោះ កំពុងមើលងាយដល់ជាតិសាសន៍ខ្លួន។
អ្នកនាំពាក្យរូបនេះ ដាក់ការសង្ស័យថាទង្វើពលរដ្ឋខ្មែរទាំងនេះ កើតចេញពីការញុះញង់របស់លោក ហុង លីម ដែលតែងតែប្រឆាំងរដ្ឋាភិបាលកម្ពុជាកន្លងមក។ លោកក៏ព្រមានដល់លោក ហុង លីម កុំឲ្យឈានជើងជាន់ទឹកដីខ្មែរឱ្យសោះ ។
សូមបញ្ជាក់ថា កាលពីថ្ងៃទី២៤ ខែកុម្ភៈ ឆ្នាំ២០១៨ សហព័ន្ធសាជីវកម្មខ្មែរ-អូស្ត្រាលី បានរៀបចំពិធីស្វាគមន៍ភរិយា និងកូនៗទាំង៥ របស់សពលោកបណ្ឌិត កែម ឡី ដែលដឹកនាំដោយអភិបាលក្រុង លោក ជា យូហន ប្រធានសមាគមខ្មែរវ៉ិកតូរីយ៉ា តំណាងរាស្ត្រគណបក្សប្រឆាំង ក្រៅពីពិធីស្វាគមន៍នេះ ក៏មានរៀបចំដុតរូបទីងមោងសម្តេច ហ៊ុន សែន ផងដែរ ។
សម្តេច ហ៊ុន សែន ធ្លាប់បានព្រមានដល់បាតុករ បើដុតរូបទីមោងសម្តេច នោះសម្តេចនឹងទៅវ៉ៃដល់ផ្ទះ។ សម្តេច ហ៊ុន សែន នឹងចូលរួមកិច្ចប្រជុំកំពូលអាស៊ាន-អូស្រ្តាលី នៅចុងខែមីនា ខាងមុខនេះ។
