ក្រោយរូបភាពភ្ជាប់ពាក្យ រវាង តារាកំប្លែង នាយចយ និងគូស្នេហ៍ក្វាន់ ឌី បានបង្ហាញនៅលើបណ្ដាញសង្គម ធ្វើឲ្យមានផេគខ្លះយកទៅត្រូល និងលេចឡើងជាពាក្យចំអករិះគន់មួយចំនួនថា មិនសាកសមគ្នា ស្នេហាមួយនេះ កើតឡើងទំនងជាមិនមែនកើតចេញពីចិត្ត និងបេះដូងឡើយ ពោលអាចមកពីភាគីខាងស្រីសម្លឹងឃើញទ្រព្យសម្បត្តិ និងកេរ្តិ៍ឈ្មោះរបស់នាយចយ...ប៉ុន្តែអ្វីទាំងអស់នោះ មិនមែនជាឧបសគ្គរារាំងនូវចិត្តស្មោះរវាងអ្នកទាំងពីរនោះទេ ទើបឈានដល់ថ្ងៃចូលរោងអាពាហ៍ពិពាហ៍នៅថ្ងៃទី២៧ កុម្ភៈ ២០១៨ ម្សិលមិញនេះ។
បើទោះបីជាពិធីមង្គលការរបស់នាយចយ នាពេលព្រឹកមិនសូវមានអ្នកសិល្បៈ អ្នកមានមុខមាត់នៅក្នុងសង្គមចូលរួមក្ដី ប៉ុន្តែទាំងនាយចយ និង ក្វាន់ ឌី នៅតែញញឹមស្រស់ស្រាយ ជានិច្ចខណៈមានវត្តមានចូលរួមអបអរពីមិត្តភក្តិ និងបងប្អូនដែលជាសាច់ញាតិទាំងសងខាង ។
តែយ៉ាងណាមិញពេលល្ងាច នាពិធីពិសាភោជនាហារវិញ គឺយើងសង្កេតឃើញភ្ញៀវកិត្តិយសចូលរួម រួមមានឯកឧត្តម ហ៊ុន ម៉ាណែត និងឯកឧត្តម ហ៊ុន ម៉ានី ព្រមទាំងមន្ត្រី និងសិល្បករ សិល្បការនី មិត្តរួមការងារយ៉ាងច្រើន កុះកររហូតដល់នាយ ទប់ទឹកភ្នែកមិនបានទៀតផង។
តែអ្វីដែលប្រិយមិត្តអ្នកគាំទ្រ ចង់ដឹងនោះគឺ អំពីអ្នកនាងក្វាន់ ឌី តើមានមូលហេតុអ្វីបានជាចងចិត្តនាង ឲ្យមានចិត្តទៅលើនាយចយ?
ជាការឆ្លើយតបអ្នកនាងបានអះអាងថា «នាងស្រឡាញ់នាយចយ គឺកើតដោយចិត្តស្មោះ និងអាណិត មិនបានគិតពីរូបរាង និងទ្រព្យសម្បត្តិអ្វីនោះឡើយ ហើយនាយចយក៍គ្មានទ្រព្យ លុយឡានអីដូចគេដែរ ។ ហើយមុននឹងសម្រេចចិត្តរៀបមង្គលការនេះ អ្នកទាំងពីរធ្លាប់បានសាងស្នេហ៍ និងស្វែងយល់ចិត្តគ្នាទៅវិញទៅមករយៈពេលជាង១ឆ្នាំមកហើយ ។ ហើយចំពោះអ្នកណាចង់សើច ឬយំមិនសំខាន់ទេ តែសំខាន់នាយចយ និងខ្លួនស្រឡាញ់គ្នា បានហើយ ។ »
សូមជម្រាបជូនថា នាយចយ ជាអ្នកខេត្តកំពង់ចាម ហើយជាតារាកំប្លែងនៅក្នុងក្រុមនាយក្រឹម ។នាយចយមានភ័ព្វវាសនាអណ្តែតឡើងក្នុងពិភពសិល្បៈកំប្លែងតាមរយៈការផ្តល់ឱកាស និងបណ្តុះបណ្តាលពីនាយក្រឹម ។
ចំណែកនាងក្វាន់ ឌី ជាអ្នកខេត្តពោធិ៍សាត់ មានអាជីពជាអ្នកអ៊ុតសក់ ។
