ព្រះសីហនុៈ បុរសម្នាក់ សង្ស័ជាមន្ត្រីរាជការ បានស្លាប់ភ្លាមៗនៅកន្លែងកើតហេតុយ៉ាងអាណោចអាធ័ម ខណៈបើកម៉ូតូវ៉ារថយន្តមិនប្រយ័ត្ន ក៏ត្រូវរថយន្តបែនដឹកខ្សាច់បុកពីក្រោយ ហើយកិនខ្ទេចសាកសពនៅកណ្តាលផ្លូវ មើលលែងយល់។
គ្រោះថ្នាក់ចរាចរណ៍ គួរឲ្យរន្ធត់មួយនេះ បានកើតឡើងកាលពីវេលាម៉ោងប្រមាណ ៩៖៤៥នាទីថ្ងៃពុធ ១៤កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៨ ខែកុម្ភៈ ឆ្នាំ២០១៨ លើផ្លូវជាតិលេខ៤ ចន្លោះគីឡូម៉ែត្រ ១២៣-១២៤ ស្ថិតនៅក្នុងភូមិក្រាំងអាត់ ឃុំកំពង់សិលា ស្រុកកំពង់សិលា ខេត្តព្រះសីហនុ។
សមត្ថកិច្ច បានឲ្យដឹងថា មុនពលកើតហេតុ គេឃើញម៉ូតូ១គ្រឿងម៉ាក YAMAHA RC ពណ៌ ខ្មៅ ពាក់ស្លាកលេខ រដ្ឋ 06 1-1876 អ្នកបើកបរមិនស្គាល់អត្តសញ្ញាណ មានទិសដៅពីខាងត្បូង ទៅជើង បានបើកវ៉ាជែង រថយន្តកុងតឺន័រប្រហែល៤ ទៅ៥គ្រឿង ដែលមានទិសដៅស្របគ្នា ពេលនោះមានរថយន្តមួយគ្រឿង មកពីខាងមុខ ធ្វើឲ្យអ្នកបើកម៉ូតូ ក៏បានគេចចូលមកខាងស្តាំដៃវិញ បណ្តាលឲ្យរថយន្តដឹកខ្សាច់បុក រួចកិនពីខាងក្រោយតែម្ដង បណ្ដាលឲ្យខ្ទេចសាកសពមើលមិនយល់។ ក្រោយកើតហេតុ ភាគីរថយន្តបានដាក់មេព្រូចបាត់។
បច្ចុប្បន្នរថយន្ត និងម៉ូតូ ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកកំពង់សិលា។ ចំណែកសាកសពជនរងគ្រោះ សមត្ថកិច្ចកំពុងស្វែងរកអត្តសញ្ញាណ និងក្រុមគ្រួសារ ដើម្បីមកទទួកយកទៅធ្វើបុណ្យទៅតាមប្រពៃណី ៕
