ភ្នំពេញៈ យុវជនម្នាក់ ជិះម៉ូតូក្នុងល្បឿនលឿន ជ្រុលបុករបាំងថ្មពុះចែកទ្រូងផ្លូវពេញទំហឹង បណ្តាលឲ្យធ្លាយក្អួត និងរងរបួសធ្ងន់ ហើយត្រូវបានបញ្ជូនទៅមន្ទីរពេទ្យ តែដោយសារតែស្ថានភាពធ្ងន់ធ្ងរពេកក៏បានស្លាប់តែម្តង។ ហេតុការណ៍នេះ បានកើតឡើងកាលពីវេលាម៉ោង១២៖២០នាទី រំលងអធ្រាត្រចូលថ្ងៃអង្គារ៍ ១៣រោច ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១៣ ខែកុម្ភៈ ឆ្នាំ២០១៨ នៅចំណុចមុខបុរី៩៩៩ តាមបណ្តោយផ្លូវជាតិលេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
តាមសាក្សីដែលឃើញហេតុការណ៍ផ្ទាល់ បានប្រាប់ភ្នាក់ងារ Cam Post ថា នៅមុនពេលកើតហេតុ គេបានឃើញជនរងគ្រោះជិះម៉ូតូម៉ាក ហុងដាឌ្រីម ធុនសេ១២៥ ស៊េរីឆ្នាំ២០១៨ ពណ៌ខ្មៅ ស្លាកលេខ កណ្តាល 1V-5882 ធ្វើដំណើរតាមបណ្តោយផ្លូវជាតិលេខ២ ពីត្បូងទៅជើងក្នុងល្បឿនលឿន។ លុះមកដល់ចំណុចកើតហេតុ ដែលជាផ្លូវកោងមុខបុរី៩៩៩ ដោយជិះមិនគោរពភ្លើងស្តុបក្រហម ហើយទំនងកាច់ចង្កូតមិនផុត ក៏ជ្រុលទៅបុកនឹងក្បាលនាគពុះចែកទ្រូងផ្លូវពេញទំហឹង បណ្តាលឲ្យបោកក្បាលខ្ទប់នឹងទ្រូងផ្លូវ បែកក្បាលហូរឈាម ធ្លាយក្អួត និងរងរបួសធ្ងន់ធ្ងរ។ ចំណែកម៉ូតូខ្ទាតចម្ងាយជាង៤០ម៉ែត្រឯណោះ។
ភ្លាមៗនោះ សមត្ថកិច្ចប៉ុស្តិ៍ចាក់អង្រែក្រោម កំពុងជិះល្បាតតាមផ្លូវមកដល់កន្លែងកើតហេតុ ហើយបានទាក់ទងរថយន្តគិលានសង្គ្រោះមកដឹកជនរងគ្រោះយកទៅមន្ទីរពេទ្យ។ ប៉ុន្តែអកុសល្យដោយសារតែស្ថានភាពធ្ងន់ធ្ងរពេក ជនរងគ្រោះក៏បានដាច់ខ្យល់ស្លាប់ពេលកំពុងសង្គ្រោះ។
ក្រោយកើតហេតុ សពជនរងគ្រោះត្រូវបានរថយន្តសង្គ្រោះដឹកមកទីតាំងកើតហេតុវិញ ដើម្បីសមត្ថកិច្ចធ្វើកោសល្យវិច័យ រួចដឹកយកទៅតម្កល់ទុកនៅវត្តដឹកថ្លា រង់ចាំក្រុមគ្រួសារមកទទួលយកទៅធ្វើបុណ្យតាមប្រពៃណី។ ដោយឡែក ម៉ូតូ ត្រូវបានសមត្ថកិច្ចប៉ុស្តិ៍ប្រគល់ឲ្យសមត្ថកិច្ចជំនាញចរាចរណ៍ខណ្ឌ យកទៅរក្សាទុកនៅអធិការដ្ឋាននគរបាលខណ្ឌមានជ័យ ដើម្បីរង់ចាំបងប្អូនយកឯកសារមកទទួលម៉ូតូវិញ៕
