មណ្ឌលគិរីៈ ក្រោយពីផ្សារសែនមនោរម្យខេត្តមណ្ឌលគិរីស្ទើរ៩០ភាគរយ ត្រូវបានអគ្គិភ័យលេបត្របាក់ កាលពីវេលាអធ្រាត្រ ថ្ងៃសៅរ៍ កន្លងទៅថ្មីៗនេះ ធ្វើឲ្យបងប្អូនប្រជាពលរដ្ឋជាង២០០គ្រួសារ ត្រូវខាតបង់ និងខូចទាំងស្រុង ទាំងលុយ ទាំងទ្រព្យសម្បតិ្តទាំងពេលវេលា និងរងទុក្ខជាទម្ងន់ស្ទើរគ្មានសល់អ្វីក្រៅពីបាតដៅទទេស្អាតសាជាថ្មី។
ដោយសារតែផ្សារឆេះក្រុមបងប្អូនក្នុងផ្សារ សុទ្ធតែរស់ពឹងពាក់ទៅលើមុខរបរប្រចាំថ្ងៃដើម្បីដោះដូរលុយកាក់ និងបង់ធនាគារ ព្រមទាំងសេវាផ្សេងៗ តែពេលនេះ តើឲ្យពួកគាត់រំពឹងអ្វីទៀត បើអ្វីៗត្រូវរលាយទៅតាមភ្លើងអស់ទៅហើយនោះ ខណៈមិនទាន់នឹងមានជម្រកនៅផង កន្លែងលក់ដូរថ្មីផង ស្រាប់តែពេលនេះ ទុក្ខមួយទៀតបានចូលមកដល់ ដោយសារបំណុលធនាគារ និងត្រូវបង់ទៅលើសេវា ទឹក ភ្លើងទៀត តើឲ្យពួកពួកគាត់ទៅរកលុយមកពីណាទាន់ទៅ។
ដោយយោងតាមការទទូចអង្វរតាមបណ្តាញសង្គមហ្វេសបុករបស់បងប្រុសម្នាក់ ក៏ដូចជាប្រជាពលរដ្ឋក្នុងផ្សារ ដោយបានសុំការជួយអន្តរាគមន៍ពីប្រមុខរដ្ឋាភិបាល ដើម្បីធ្វើការពន្យាពេលទៅដល់ខាងធនាគារផ្សេងៗសម្រាប់ការសងបំណុល ពីព្រោះពួកគាត់កំពុងតែជួបបញ្ហា ជាន់លើទុក្ខដូចដែលឃើញស្រាប់ពេលនេះ៕
