តាមសមត្ថកិច្ចបានឱ្យដឹងថា៖ ជនដៃដល់ ឈ្មោះ ផល ពេញ ជានាយប៉ុស្តិ៍អូរលែ ដែលបានបាញ់សម្លាប់មនុស្ស៣នាក់ នៅខេត្តមណ្ឌលគិរី ត្រូវបានសមត្ថកិច្ចចាប់ខ្លួនបានហើយ នៅថ្ងៃទី២ ខែកុម្ភៈ ឆ្នាំ២០១៨ នេះ។ មនុស្ស៤នាក់ផ្សេងទៀតដែលពាក់ព័ន្ធនឹងរឿងនេះត្រូវបានឃាត់ខ្លួនផងដែរ។
ឧត្តមសេនីយ៍ត្រី សូ សុវណ្ណ ស្នងការរងទទួលផែនព្រហ្មទណ្ឌ ខេត្តមណ្ឌលគិរី បានថ្លែងថា ជនដៃដល់ត្រូវបានចាប់ខ្លួន នៅក្នុងស្រុកមេមត់ ខេត្តត្បូងឃ្មុំ ខណៈជនដៃដល់រូបនេះបម្រុងរត់គេចខ្លួនទៅស្រុកកំណើត នៅខេត្តព្រៃវែង។
កាលពីម្សិលមិញ សមត្ថកិច្ចបានចាប់ខ្លួនមន្រ្តីយោធាការពារព្រំដែនឈ្មោះ កើត វេហា ហៅ ឆៃ ដែលពាក់ព័ន្ធនឹងការបាញ់សម្លាប់មន្រ្តីអាវុធហត្ថ មន្រ្តីបរិស្ថាន និងបុគ្គលិកអង្គការ WCS នៅស្រុកអូររាំង។
សូមបញ្ជាក់ថា៖ កាលពីល្ងាចថ្ងៃទី៣០ ខែមករា ឆ្នាំ២០១៨ នៅចន្លោះម៉ោង៤ ទៅម៉ោង៥ មានការបាញ់ប្រហារមួយបានកើតឡើងនៅចំណុចប៉ុស្ដិ៍អូររលែ ក្នុងភូមិសាស្ដ្រភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី បានបណ្ដាលឲ្យស្លាប់មនុស្ស៣នាក់ រួមមាន៖ មន្ដ្រីអាវុធហត្ថលើផ្ទៃប្រទេសម្នាក់ មន្ដ្រីឧទ្យានុរក្ស នៃមន្ទីរបរិស្ថាន ខេត្តមណ្ឌលគិរី និងបុគ្គលិកអង្គការសមាគមអភិរក្សាសត្វព្រៃ Wildlife Conservation Society (WCS)។
