ស្វាយរៀងៈ លោកប្ដីចិត្តកំណាចម្នាក់ ត្រូវបានសមត្ថកិច្ចចាប់ដាក់ខ្នោះ ក្រោយពីធ្វើសកម្មភាពយកសាំងចាក់ដុតប្រពន្ធ និងកូនទាំងរស់ ព្រោះតែរឿងប្រចណ្ឌខុសទំនង។
ហេតុការណ៍ខាងលើនេះ បានកើតឡើងកាលពីម៉ោង៩និង៣០នាទីយប់ថ្ងៃទី២៥ ខែកុម្ភៈ ឆ្នាំ២០១៨ ស្ថិតនៅភូមិចេក ឃុំសំរោង ស្រុកចន្រ្ទា ខេត្តស្វាយរៀង។
អាវុធហត្ថស្រុកចន្ទ្រា បានឲ្យដឹងថា បុរសជាប្ដី ឈ្មោះ ថុល ចាន់ អាយុ៤៧ឆ្នាំ បានយកសាំងមកចាក់លើមុង រួចដុតបណ្ដាលឲ្យឆេះរលាកប្រពន្ធឈ្មោះ តឿ ចិន្ដា អាយុ៣៧ឆ្នាំ និងកូនឈ្មោះ វ៉ាត់ សុជាតិ ភេទប្រុស អាយុ៦ឆ្នាំ រងរបួសធ្ងន់។
ប្រភពពីអ្នកជិតខាង បានដឹងថា ក្រុមគ្រួសារនេះ តែងតែឈ្លោះប្រកែកគ្នាជាប្រចាំ ដោយសារតែប្តីនេះ ចូលចិត្តផឹងស្រាស្រវឹងខួប ហើយថ្ងៃកើតហេតុនេះ ស្រាប់តែឮឈ្លោះប្រកែកគ្នា មួយសន្ទុះក្រោយមក ក៏ស្រាប់តែសំឡេងស្រែកឲ្យជួយ ប្រជាពលរដ្ឋក៏បានរត់ទៅដល់ផ្ទះជនរងគ្រោះឃើញមានភ្លើងឆេះមុង ក៏នាំគ្នាទាញមុងចេញឃើញម្តាយនិងកូន ត្រូវភ្លើងឆេះរលាកពេញជើង និងខ្លួនទាំងម្តាយនិងកូន។ ប៉ុន្តែហេតុការណ៍នេះ មិនបណ្តាឲ្យឆេះខូចខាតទ្រព្យសម្បត្តិអ្វីនោះទេ ដោយសារតែបងប្អូនប្រជាពលរដ្ឋបានជួយទាន់ពេល។
ដោយឃើញម្ដាយ និងកូនមានសភាពធ្ងន់ធ្ងរ ទើបបងប្អូនប្រជាពលរដ្ឋក៏បាននាំជនរងគ្រោះទាំងពីរទៅព្យាបាលនៅមន្ទីរពេទ្យបង្អែកជីភូ ដើម្បីធ្វើការសង្គ្រោះ។ ចំណែកបុរសជាប្ដី ត្រូវសមត្ថកិច្ចឃាត់ខ្លួនយកទៅសួរនាំនៅអធិកាដ្ឋានស្រុកចន្ទ្រា ដើម្បីកសាងសំណុំរឿងបញ្ជូនចាត់ការតាមនិតិវិធីច្បាប់៕
