កញ្ញា កឹម មនោវិទ្យា អតីអនុប្រធានទំនាក់ទំនងសាធារណៈ របស់អតីគណបក្សសង្គ្រោះជាតិ បានទាមទារឲ្យរដ្ឋាភិបាលជប៉ុនចេញមុខពន្យល់បកស្រាយអំពីការបន្តផ្តល់ជំនួយគាំទ្រ ដល់គណៈកម្មាធិការជាតិរៀបចំការបោះឆ្នោត ( គ.ជ.ប)។
តាមរយៈគេហទំព័រ Twitter កញ្ញា កឹម មនោវិទ្យា បានសរសេរថា៖ ប្រទេសជប៉ុនត្រូវតែពន្យល់ប្រាប់ដល់ប្រជាពលរដ្ឋខ្មែរឱ្យដឹងអំពីមូលហេតុដែលប្រទេសមួយនេះសម្រេចបន្តផ្ដល់ការគាំទ្រដល់ដំណើរការបោះឆ្នោតសិប្បនិមិត្ត នៅគ្រាដែលឆន្ទៈរបស់ពលរដ្ឋខ្មែររាប់លាននាក់ត្រូវបានរបបលោកនាយករដ្ឋមន្ត្រី ហ៊ុន សែន ប្លន់យក។
សូមបញ្ជាក់ថា កាលពីព្រឹកថ្ងៃទី២១ ខែកុម្ភៈ ឆ្នាំ២០១៨ នៅទីស្ដីការក្រសួងការបរទេស និងកិច្ចសហប្រតិបត្តិការអន្តរជាតិ ឯកឧត្ដម ប្រាក់ សុខុន ទេសរដ្ឋមន្រ្ដី និងឯកឧត្តម ហូរីណូអ៊ូជិ ហ៊ីដេហ៊ីសា ឯកអគ្គរាជទូតជប៉ុនប្រចាំកម្ពុជា បានចុះហត្ថលេខាលើលិខិតប្ដូរសារ និងកំណត់ហេតុនៃការពិភាក្សាស្ដីពីការផ្ដល់ហិរញ្ញប្បទានឥតសំណង ដែលមានទឹកប្រាក់សរុបចំនួន ៨០០ លានយ៉េន (ប្រមាណ ៧ លានដុល្លារអាមេរិក) សម្រាប់អនុវត្តគម្រោងកម្មវិធីអភិវឌ្ឍន៍សេដ្ឋកិច្ច និងសង្គម។ នៅក្នុងក្របខណ្ឌនៃកម្មវិធីនេះ រដ្ឋាភិបាលជប៉ុននឹងផ្ដល់ហិបឆ្នោត ព្រមទាំងសម្ភារចាំបាច់ដទៃទៀត ដល់គណៈកម្មាធិការជាតិរៀបចំការបោះឆ្នោត (គជប) សម្រាប់ការបោះឆ្នោតជាតិ ដែលនឹងប្រព្រឹត្តទៅនៅខែកក្កដា ឆ្នាំ២០១៨ ខាងមុខនេះ។ ប្រទេសជប៉ុនជាប្រទេសម្ចាស់ជំនួយធំជាងគេដល់ដំណើរការបោះឆ្នោតនៅកម្ពុជា ដែលបានសន្យាថានឹងបន្តផ្ដល់ជំនួយដល់ដំណើរការបោះឆ្នោតព្រឹទ្ធសភា ចុងខែកុម្ភៈ ឆ្នាំ២០១៨ និងបោះឆ្នោតជាតិ នៅចុងខែកក្កដា ឆ្នាំ២០១៨។
យោងតាមអ្នកនាំពាក្រ គ.ជ.ប បានឱ្យដឹងថា គ.ជ.ប ត្រូវការហិបឆ្នោតចំនួន៣ម៉ឺនបន្ថែមទៀត ខណៈដែលប្រទេសចិនគ្រោងនឹងបញ្ជូនសម្ភារសម្រាប់បម្រើឲ្យការបោះឆ្នោតដល់ គ.ជ.ប នៅខែមីនា ខាងមុខនេះ។
សហរដ្ឋអាមេរិក និងសហភាពអឺរ៉ុប បានសម្រេចលុបចោលជំនួយរបស់ខ្លួន និងមិនគាំទ្រដល់ស្ថាប័នរៀបចំការបោះឆ្នោត ក្រោយពេលដែលតុលាការកំពូលសម្រេចរំលាយគណបក្សសង្គ្រោះជាតិ។
