អាម៉ាប៉ាប៉ាញ៉ូស
ប៉ៃលិនៈ ជាទូទៅឲ្យតែមានកម្មវិធីតាំងពិព័រណ៍ដាក់តាំងមុខទំនិញម្តងៗ ប្រជាពលរដ្ឋទាំងក្មេងចាស់ប្រុសស្រីបាននាំគ្នាទៅទិញសម្លៀកបំពាក់ ម្ហូបអាហារ និងនំចំណីយកមកទទួលទាន តែពួកគាត់មិនបានចាប់អារម្ភពីមុខទំនិញមួយចំនួនធំ គឺសុទ្ធសឹងខូចគុណភាព និងហួសកាលបរិច្ឆេទប្រើប្រាស់ ដែលគេដាក់លក់បន្លំនៅក្នុងកម្មវិធី។
ជាក់ស្តែង កាលពីយប់ថ្ងៃទី៥ ខែកុម្ភៈ ឆ្នាំ២០១៨ កន្លងទៅ មានកម្មវិធីតាំងពិព័រណ៍ស្ថិតក្នុងភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន គេសង្កេតឃើញប្រជាពលរដ្ឋខេត្តប៉ៃលិនក្មេងចាស់ប្រុសស្រីយ៉ាងច្រើន បាននាំគ្នាសម្រុកទៅទិញទំនិញក្នុងពិធីនោះ ខណៈគេប្រទះឃើញគ្រឿងបរិភោគមួយចំនួនសុទ្ធសឹងតែហួសកាលបរិច្ឆេទប្រើប្រាស់។
ការដាក់តាំងមុខទំនិញលក់ពេលរាត្រីនេះ គឺគេបានធ្វើឡើងរយៈពេល១សប្តាហ៍មកហើយ ដោយចាប់ពីតាំងពីយប់ថ្ងៃទី៣ រហូតដល់ថ្ងៃទី៩ ខែកុម្ភៈ ទើបរើតូបទៅវិញ ហើយការលក់ដូរនេះ មានគេដាក់ផលិតផលរបស់ខ្មែរ និងមានជនជាតិថៃលក់ដូរផងដែរ។
ប្រជាពលរដ្ឋថា ការដាក់លក់ផលិតផលបែបនេះ គួរតែខាងជំនាញធ្វើការចុះត្រួតពិនិត្យមើលឲ្យបានត្រឹមត្រូវសិន ចាំអនុញ្ញាតឱ្យអាជីវករយកទំនិញរបស់ខ្លួនមកតាំងលក់ដូចនេះ ព្រោះថា ទំនិញហួសកាលបរិច្ឆេទវាធ្វើឲ្យប៉ះពាល់យ៉ាងខ្លាំងដល់សុខភាពរបស់ប្រជាពលរដ្ឋ។
លោក សុខ សាធីម ប្រធានមន្ទីរពាណិជ្ជកម្មខេត្ត ធ្លាប់បានថ្លែងថា ខេត្តប៉ៃលិន ក្នុង១ឆ្នាំៗ បានបើកលក់ទំនិញពេលរាត្រី ឬការតាំងពិព័រណ៍ ២ទៅ៣ដង ដោយមានទំនិញមកពីប្រទេសថៃ និងខ្មែរយើងរួមគ្នាផងដែរ, ហើយមុននឹងដាក់ឱ្យលក់ដូរខាងមន្ត្រីលោក គឺតែងតែធ្វើការត្រួតពិនិត្យមើលជាមុន បើសិនជាមានទំនិញហួសកាលបរិច្ឆេទ គឺមិនអនុញ្ញាតឱ្យលក់ដូរនោះឡើយ ។
តែយ៉ាងណាក៏ដោយ ចំពោះករណីប្រជាពលរដ្ឋប្រទះឃើញទំនិញហួសកាលបរិច្ឆេទប្រើប្រាស់ដាក់តាំងលក់ក្នុងពិធីតាំងពិព័រណ៍នេះ មិនដឹងថា មន្ត្រីមន្ទីរពាណិជ្ជកម្មខេត្តប៉ៃលិនភ្លេចពិនិត្យ ឬយ៉ាងណាទេ?៕
