កាលពីថ្ងៃទី០៥ ខែកុម្ភៈ ឆ្នាំ២០១៨ លោក ជួន ណារិន្ទ ស្នងការនគរបាលខេត្តព្រះសីហនុ បានច្រានចោលការរិះគន់ដែលថាកំណើនជនជាតិចិនក្នុងខេត្តជាប់មាត់សមុទ្រមួយនេះ បានបង្កភាពអសន្តិសុខ។ លោក អះអាងថា ជនបរទេសដែលភាគច្រើនជាជនជាតិចិនទាំងនោះ មិនបានបង្កផលប៉ះពាល់អវិជ្ជមានធ្ងន់ធ្ងរគួរឲ្យបារម្ភនោះទេ គ្រាន់តែបានប្រព្រឹត្តបញ្ហាតូចតាច។ ការអះអាងនេះកើតមានបន្ទាប់ពី លោក យន្ត មីន អភិបាលខេត្តព្រះសីហនុ កាលពីចុងខែមករា ផ្ញើលិខិតមួយច្បាប់ជូនលោក ស ខេង រដ្ឋមន្រ្តីក្រសួងមហាផ្ទៃ ដោយបញ្ជាក់ថា កំណើនជនបរទេសដែលភាគច្រើនជាជនជាតិចិនក្នុងខេត្តព្រះសីហនុ កំពុងធ្វើឲ្យមានផលប៉ះពាល់ផ្សេងៗ តាមរយៈការធ្វើសកម្មភាពខុសច្បាប់។។
លោកឧត្តមសេនីយ៍ទោ ជួន ណារិន្ទ បញ្ជាក់ថា៖ ផលដែលវិជ្ជមានដែលខ្ញុំទទួល ខ្ញុំជាសមត្ថកិច្ចនគរបាល ទី១សន្តិសុខដូចអត់ពាក់ព័ន្ធអីទេ។ ធម្មតា គ្រាន់តែទាស់ទែងគ្នាតិចតួចៗរវាងគាត់ និងគាត់ហ្នឹង យើងមកអប់រំ ផ្សះផ្សារ ហើយពន្យល់ពីផ្លូវច្បាប់គាត់។ អ៊ីចឹង គាត់គោរពស្នងការណាស់ ខាងសមត្ថកិច្ច។ អញ្ចឹងយើងណែនាំអំពីផ្លូវច្បាប់។ ទី២ ការបើកបរ វាចំនួនតូច តែឥលូវយើងរឹតបន្តឹងច្បាប់អំពីអ្នកដែលគ្មានប័ណ្ណបើកបរ មិនអាចកាន់ដៃចង្កូតបានទេ។ សូម្បីតែខ្មែរយើងក៏បើកលឿនៗដែរ គ្រប់សមាសភាព។ អញ្ចឹងទេយើងកាត់បន្ថយទាំងអស់ រួម និយាយឲ្យចំទៅគោរពច្បាប់ មិនប្រកាន់ពូជសាសន៍ ពណ៌សម្បុរទេ។
បើតាមរបាយការណ៍របស់លោក យន្ត មីន ផ្ញើជូន លោក ស ខេង កាលពីថ្ងៃទី២៤ ខែមករា កន្លងទៅ បញ្ជាក់ថា ក្នុងឆ្នាំ២០១៧កន្លងទៅមានភ្ញៀវទេសចរណ៍និងវិនិយោគិនជាជនបរទេសយ៉ាងច្រើនចូលមកស្នាក់នៅ និងបណ្តាក់ទុនក្នុងខេត្ត។ លោកបន្តក្នុងរបាយការណ៍នោះថា ជនបរទេសដែលមកស្នើសុំសៀវភៅការងារក្នុងខេត្តព្រះសីហនុ មានជាង៦ពាន់នាក់ (៦,៣៨៥នាក់) ក្នុងនោះជនជាតិចិនមានចំនួនជាង៤ពាន់នាក់ (៤,៤៩៨នាក់) ស្មើនឹងប្រមាណជា៧០% នៃជនបរទេសចំនួន៦១សញ្ជាតិ។
កាលពីសប្តាហ៍មុន លោកនាយករដ្ឋមន្ត្រី ហ៊ុន សែន ក៏បានប្រកាសប្រាប់កុំឲ្យពលរដ្ឋមានការព្រួយបារម្ភអំពីកំណើនអ្នកវិនិយោគចិននៅប្រទេសកម្ពុជា ដោយថា កម្ពុជានៅខ្វះខាតធនធានមនុស្ស ដូច្នេះហើយបានជាត្រូវការអ្នកវិនិយោគពីក្រៅប្រទេស។
បើតាមអ្នកឃ្លាំមើលសង្គមប្រចាំខេត្តព្រះសីហនុបានលើកឡើងថា កំណើនជនជាតិចិនមកស្នាក់នៅនិងធ្វើការក្នុងខេត្តព្រះសីហនុបានធ្វើឲ្យមានភាពអវិជ្ជមានច្រើនជាងភាពវិជ្ជមាន និងបានធ្វើឲ្យប៉ះពាល់យ៉ាងខ្លាំងដល់ជីវភាព និងការរស់នៅរបស់ប្រជាពលរដ្ឋខ្មែរ តាមរយៈការដែលជនជាតិចិនទាំងនោះចូលមកធ្វើការ រកស៊ី និងបើកបនល្បែងកាស៊ីណូ ព្រមទាំងបានប្រើពាក្យសម្ដីអសីលធម៌ ស្រែកឡូឡា មិនគោរពច្បាប់កម្ពុជាជាដើម។
