កាលពីថ្ងៃទី២៦ ខែកុម្ភៈ ឆ្នាំ២០១៨ ម្សិលមិញ ប្រទេសចិនតាមរយៈស្ថានទូតរបស់ខ្លួនប្រចាំនៅកម្ពុជា បានរៀបចំពិធីប្រគល់-ទទួលសម្ភារឧរករណ៍បរិក្ខារពេទ្យចំនួ២០មុខ ដែលជាអំណោយរបស់ក្រសួងការពារចិនប្រគល់ជូនដល់មន្ទីពេទ្យព្រះកេតុមាលា(ពេទ្យទាហាន)ទុកសម្រាប់ប្រើប្រាស់ និងព្យាបាលជំងឺ។
លោក Xiong Bo ឯកអគ្គរដ្ឋទូតនៃសាធាណររដ្ឋប្រជាមានិតចិនប្រចាំនៅកម្ពុជា បានថ្លែងថា៖ ការផ្តល់ឧបករណ៍ពេទ្យដែលជាជំនួយឥតសំណងរបស់រដ្ឋាភិបាលចិនទាំងនេះដល់មន្ទីរពេទ្យព្រះកេតុមាលា គឺកិច្ចសហប្រតិបត្តិការទ្វេភាគីនៃប្រទេសទាំងពីរលើវិស័យកងទ័ព។ ឯកអគ្គរដ្ឋទូតរូបនេះបញ្ជាក់ទៀតថា ប្រទេសចិនបានផ្តល់ជំនួយឥតសំណងដល់មន្ទីរពេទ្យព្រះកេតុមាលានេះ ចាប់តាំងពីឆ្នាំ២០០១ រហូតដល់បច្ចុប្បន្នមានចំនួន១៣លើក រាប់ទាំង ពេទ្យបណ្តុះបណ្តាលជំនាញដល់គ្រូពេទ្យ និងឧបករណ៍ជាច្រើន។ឧបករណ៍ពេទ្យទាំង២៤មុខរួមមាន៖ ឧបករណ៍វះកាត់បេះដូង ព្យាបាលសួត និងខួរក្បាល ជាដើម ដែលគិតជាទឹកប្រាក់ប្រមាណជា ៥លានដុល្លារអាមេរិក។
ជាការឆ្លើយតប សម្តេចពិជ័យសេនា ទៀ បាញ់ រដ្ឋមន្ត្រីក្រសួងការពារប្រទេសកម្ពុជា បានគូសបញ្ជាក់ថា៖ សម្ភារឧបករណ៍បរិក្ខារពេទ្យ ដែលប្រទេសចិនដែលផ្តល់មកមន្ទីរពេទ្យព្រះកេតុមាលានេះ ពិតជាមានសារ:សំខាន់ណាស់ក្នុងការជួយដល់ការព្យាបាល និងសង្គ្រោះអ្នកជំងឺទូទៅបានទាន់ពេលវេលាស្របតាមតម្រូវការនៃប្រទេសកម្ពុជានាពេលបច្ចុប្បន្ននេះ។
ឆ្លៀតក្នុងឱកាសនោះ រដ្ឋមន្ត្រីក្រសួងការពារក៏បានស្នើដល់មន្ត្រីនៃមន្ទីរពេទ្យនេះយកចិត្តទុកដាក់សិក្សាបន្ថែមទៀតឱ្យបានស៊ីជម្រៅទៅលើឧបករណ៍ទាំងនេះ មុននឹងប្រើប្រាស់ព្យាបាលអ្នកជំងឺ ជៀសវាងការប្រើប្រាស់ខុសបច្ចេកទេស ព្រោះឧបករណ៍បរិក្ខារទាំងនេះសុទ្ធសឹងតែជារបស់ទំនើបតាមបែបបច្ចេកវិទ្យាចុងក្រោយបំផុតរបស់ពិភពលោក។
ទោះជាយ៉ាងណាងក៏ដោយឧបករណ៍ទាំងនេះមិនទាន់គ្រប់គ្រាន់តាមតម្រូវការនៅឡើយ មន្ទីរពេទ្យនឹងស្នើសុំបន្ថែមទៀតពីប្រទេសចិនស្របតាមការរីកចម្រើននៃចំណេះដឹងរបស់វេជ្ជបណ្ឌិតកម្ពុជា។ នេះការប្រសាសន៍របស់ សម្តេច ទៀ បាញ់។
លើសពីនេះទៅទៀត សម្តេចគូសបញ្ជាក់ទៀតថា៖ ប្រទេសចិនគឺជាមិត្តល្អរបស់កម្ពុជាដែលតែងតែជួយដល់កម្ពុជាគ្រប់កាល:ទេស: ស្ទើរតែគ្រប់វិស័យ ទាំងវិស័យយោធា និងឧបករណ៍បរិក្ខារពេទ្យជាដើម ទាំងនេះឆ្លុះបញ្ចាំងចំណងមិត្តភាព និងកិច្ចសហប្រត្តិការគ្រប់ជ្រុងជ្រោយនៃប្រទេសទាំងពីរដែលជាដៃគូយុទ្ធសាស្ត្រដ៏ស៊ីជម្រៅ ដែលជាគន្លឹះនិងសេចក្ដីត្រូវការចាំបាច់របស់កម្ពុជា។
