យោងតាមលិខិតចុះថ្ងៃទី២១ ខែកុម្ភៈ ឆ្នាំ២០១៨ គណបក្សភ្លើងទៀន ដែលប្តូរឈ្មោះពីគណបក្សសម រង្ស៊ី បានប្រកាសធ្វើសមាជនៅដើមសប្ដាហ៍ក្រោយ ដើម្បីធ្វើវិសោធនកម្មប្រការមួយចំនួននៃលក្ខន្តិកៈគណបក្ស។
ក្នុងលិខិតដែលដាក់ទៅកាន់រដ្ឋមន្រ្តីក្រសួងមហាផ្ទៃ ប្រធានគណបក្សភ្លើងទៀន លោក ទាវ វណ្ណុល បានជូនដំណឹងពីការធ្វើសមាជវិសាមញ្ញរបស់គណបក្ស ភ្លើងទៀន ដែលនឹងធ្វើនៅថ្ងៃទី២៦ ខែកុម្ភៈ ឆ្នាំ២០១៨ ខាងមុខនេះ។
សមាជវិសាមញ្ញរបស់គណបក្សភ្លើងទៀន គ្រោងធ្វើចាប់ពីម៉ោង៩ ព្រឹក ដល់ម៉ោង ១២ ថ្ងៃត្រង់ នៅទីស្នាក់ការកណ្ដាលគណបក្ស ស្ថិតនៅផ្ទះលេខ៥៧៦ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដែលមានសមាជិក ៦០ រូបចូលរួម ដើម្បីធ្វើវិសោធនកម្មកែប្រែប្រការមួយចំនួននៃ លក្ខន្តិកៈគណបក្ស។
សូមបញ្ជាក់ថា កាលពីថ្មីៗនេះ គណបក្សសិទ្ធិមនុស្ស (បង្កើតឡើងដោយ លោក កឹម សុខា) បានប្រកាសរំលាយគណបក្សដោយខ្លួនឯង ប៉ុន្តែក្រសួងមហាផ្ទៃមិនទាន់ទទួលស្គាល់ការរំលាយនេះទេ។ អតីតគណបក្សសង្គ្រោះជាតិកើតចេញពីការរួមគ្នារវាងគណបក្សសម រង្ស៊ី (គណបក្សភ្លើងទៀន) និងគណបក្សសិទ្ធិមនុស្ស។
