កែបៈ នារីម្នាក់ មានមុខរបរជាស្រ្តីម៉ាស្សា នឹងត្រូវជាកូនប្រសារបស់មន្រ្តីប៉េអឹមខេត្តកែបម្នាក់ ត្រូវបានជនមិនស្គាល់មុខប៉ងរំលោភ តែមិនបានសម្រេច រួចក៏អារកសម្លាប់ចោល កុំឲ្យបែកការ។
នារីរងគ្រោះ ត្រូវជនល្មើសប៉ងរំលោភ ហើយអារកសម្លាប់នៅបន្ទប់ម៉ាស្សាយីហោ "លីដាម៉ាស្សាខ្មែរ" ស្ថិតនៅផ្សារក្តាម ក្នុងភូមិថ្មី សង្កាត់ព្រៃធំ ក្រុងកែប ខេត្តកែប អំឡុងម៉ោងជិត៨យប់ថ្ងៃទី២៧ ខែកុម្ភៈ ឆ្នាំ២០១៨។
សមត្ថកិច្ច បានឲ្យដឹងថា នារីរងគ្រោះឈ្មោះ លុច គាន អាយុ២៧ឆ្នាំ មុខរបរអ្នកម៉ាស្សា មានប្តីឈ្មោះ ប៉ក់ សូនវិបុល អាយុ២៧ឆ្នាំ មុខរបរធ្វើស្រែ មានកូនស្រីម្នាក់ អាយុ៨ខែ។ សមត្ថកិច្ចបញ្ជាក់ថា ឪពុកក្មេក នារីរងគ្រោះឈ្មោះ សុខសំអាត វរសេនីយ៍ទោបញ្ជាការរងអាវុធហត្ថខេត្តកែប។
សមត្ថកិច្ច បន្តថា នារីរងគ្រោះត្រូវជនល្មើសប៉ុនប៉ងរំលោភមិនបានសម្រេច ព្រោះសពនារីរងគ្រោះ ត្រូវបានជនល្មើសស្រាតខោបានត្រឹមជង្គង់ ខណៈនារីរងគ្រោះកំពុងមានរដូវ ទន្ទឹមនឹងរំលោភមិនបាន ជនល្មើសក៏បានអារកសម្លាប់នារីរងគ្រោះ ដើម្បីបំបិទមាត់។
ក្រោយកើតហេតុសមត្ថកិច្ចបានដាក់កម្លាំងតាមស្រាវជ្រាវវែករកមុខសញ្ញាជនដៃដល់ ដើម្បីយកមកផ្តន្ទាទោសតាមច្បាប់ ក្នុងនោះសមត្ថកិច្ចក៏បានស្នើសុំធនាគារ ABA ដែលនៅក្បែរនោះ ឲ្យឆែកកាមេរ៉ាទូ ATM ក្រែងអាចថតជាប់មុខសញ្ញាជនល្មើស៕
