ភ្នំពេញ៖ កម្លាំងសមត្ថកិច្ចកំពុងរឹតបន្តឹងច្បាប់ចរាចរណ៍ផ្លូវគោក ដើម្បីរួមចំណែកក្នុងការកាត់បន្ថយការស្លាប់ដោយគ្រោះថ្នាក់ចរាចរ តែនៅមួយចំនួននៅតែបន្តមិនគោរពច្បាប់ ទាំងខ្លួនមានគ្រប់គ្រាន់អស់ហើយ តែបែរជាមកខ្លាចសមត្ថកិច្ចចាប់ផាកពិន័យទៅវិញ ជាក់ស្ដែងបុរសវ័យ ២៣ឆ្នាំម្នាក់នេះ បានជិះម៉ូតូចេញពីកន្លែងធ្វើការ ដោយមិនបានពាក់មួកសុវត្ថិភាពឡើយ ពោលគឺបុរសរូបនោះ បានទុកមួកសុវត្ថិភាពនៅនឹងរានម៉ូតូ។
អ្វីដែលគួរឲ្យហួសចិត្តនោះគឺ ពេលដែលជិះជិតដល់ស្តុប បុរសម្នាក់នោះ បានឃើញបូលិស ក៏ប្រញាប់ប្រញាល់ស្រវេស្រវា យកមួកមកពាក់ ហើយធ្វើដំណើរទៅមុខបន្ត។
ពេលដល់កន្លែងត្រួតពិនិត្យ ប៉ូលិសបានហៅឲ្យឈប់ បុរសនោះក៏ឈប់ ហើយក៏ឆ្ងល់ក្នុងចិត្តថា «តើខ្ញុំខុសអ្វីបានជាប៉ូលិសឃាត់ខ្លួនយ៉ាងដូច្នឹង?»។
គិតហើយក៏បានសួរសំណួរនេះទៅប៉ូលិស! ប៉ូលិសចរាចរណ៍តបយ៉ាងខ្លីថា «ប្អូនមើលមួករបស់ប្អូនពាក់យ៉ាងម៉េចដែរ ???»
ក្រោយពីបានដឹងមូលហេតុដែលប៉ូលិសឃាត់ខ្លួន បុរសនោះ ក៏អស់សំណើចនឹងខ្លួនឯង ដោយព្រមឲ្យប៉ូលិសផាកពិន័យ ដោយគ្មានពាក្យនឹងវាចារ៕
