
ភ្នំពេញៈ កម្ពុជា មិនបានព្រួយបារម្ភចំពោះការព្រមានផ្នែកសេដ្ឋកិច្ចពីប្រទេសមហាអំណាចមួយចំនួននោះទេ ទោះបីជាមានការព្រមានយ៉ាងណាក្តី។ នេះបើតាមការ អះអាងរបស់មន្ត្រីជាន់ខ្ពស់គណបក្សប្រជាជនកម្ពុជា។
លោក សុខ ឥសាន អ្នកនំាពាក្យគណបក្សប្រជាជនកម្ពុជា បានឲ្យដឹងនៅថ្ងៃទី១ ខែមីនា ឆ្នាំ ២០១៨ ដោយបញ្ជាក់យ៉ាងដូច្នេះថា «សូមទាញអារម្មណ៍ថា បច្ចុប្បន្ននេះ នៅលើពិភពលោកនេះ មិនមែនមានតែប៉ូលមួយផ្តាច់មុខនោះទេ មិនមែនដូចនៅក្នុងទស្សរត្សរ៍ទី១៩៧៩ទេ ។ ហើយប្រជាជនកម្ពុជា ក៏ធ្លាប់ភ្លក្សរសជាតិការហ៊ុំព័ទ្ធសេដ្ឋកិច្ច និងការគាបសង្កត់សេដ្ឋកិច្ចដ៏ ជូរចត់ពីមហាអំណាចខាងលិចរួចហើយ ដោយសារតែកាន់ជើងពួកខ្មែរក្រហមប៉ុលពត តែកម្ពុជានៅតែអាចរស់បានរហូតដល់សព្វថ្ងៃមានការអភិវឌ្ឍន៍រីកចម្រើនលើគ្រប់វិស័យកម្ពុជា មិនញញើតចំពោះការគាបសង្កត់ ដោយអយុត្តិធ៌មណាមួយជាដាច់ខាត»។
លោកបន្តថា កម្ពុជានៅតែប្តេជ្ញាដើរតាមគន្លងលទ្ធិប្រជាធិបតេយ្យ និងនីតិរដ្ឋជានិច្ច ដែលជាស្មារតីនៃកិច្ចព្រមព្រៀងទីក្រុងប៉ារីសថ្ងៃ២៣ តុលា ១៩៩១។
ដូច្នេះក្តីសង្ឃឹមថា យកការគាបសង្កត់ និងវិធានការណ៍ដាក់ទណ្ឌកម្មសេដ្ឋកិច្ចបែបណា មកអនុវត្តលើរាជរដ្ឋាភិបាលកម្ពុជា ដើម្បីចាប់បង្ខំឲ្យមានការចរចាជាមួយពួកល្មើសច្បាប់ និងពួកឧទ្ទាមក្រៅច្បាប់នោះ មិនអាចទទួលយកបាន និងក៏មិនអាចក្លាយជាការពិតដែរ។ ហេតុនេះ ក្តីសង្ឃឹមរបស់ពួកជនក្រៅច្បាប់នោះ មិនអាចចេញជារូបរាងបានជាដាច់ខាត។
ការលើកឡើងរបស់មន្ត្រីជាន់ខ្ពស់កាន់អំណាច ដែលដឹកនាំរដ្ឋាភិបាលជាង៣០ឆ្នាំមកនេះដោយសារតែកម្ពុជា មានបង្អែកដ៏ធំនិងរឹងមាំ គឺប្រទេសចិន ដែលជាមហាមិត្តរបស់កម្ពុជា និងប្រទេសមួយចំនួនទៀត ដែលគំាទ្រជំហររបស់កម្ពុជា។
លើសនេះ ការបង្ហាញជំហររបស់មន្ត្រីអ្នកនំាពាក្យខាងលើ ក្រោយអតីតមន្ត្រីបក្សប្រឆាំងដែលបានប្រព្រឹត្តបទល្មើសធ្ងន់ធ្ងរ ហើយដែលត្រូវតុលាការកំពូលកាត់សេចក្តីរំលាយចោល និងផ្អាកសកម្មភាពនយោបាយរយៈពេល៥ឆ្នាំ ពួកគេមិនទទួលស្គាល់ការពិតនៃ អំពើល្មើសច្បាប់របស់ខ្លួន ក្នុងសកម្មភាពអនុវត្តផែនការផ្តួលរំលំរាជរដ្ឋាភិបាលកម្ពុជាស្របច្បាប់ តាមរូបភាពបដិវត្តន៍ពណ៌រំលងលទ្ធិប្រជាធិបតេយ្យ ដែលជាស្មារតីនៃកិច្ចព្រមព្រៀងទីក្រុង ប៉ារីសថ្ងៃ២៣ តុលា ១៩៩១។
ដើម្បីឲ្យបានរស់ឡើងវិញ ពួកអាយ៉ងធ្វើបដិវត្តន៍ពណ៌ត្រូវបរាជ័យ បានខិតខំកៀរគរ ចៅហ្វាយនាយរបស់ខ្លួនឲ្យដាក់ទណ្ឌកម្ម លើរាជរដ្ឋាភិបាលកម្ពុជា ក្នុងគោលបំណងគាបសង្កត់ឲ្យមានការចរចាជាមួយពួកគេ បានរស់ឡើងវិញ និងបានចូលរួមក្នុងការបោះឆ្នោតជ្រើសតាំងតំណាងរាស្ត្រនាថ្ងៃទី២៩ ខែកក្កដា ឆ្នាំ២០១៨ នេះ។
យ៉ាងណាក្តីលោក សុខ ឥសាន បានគូសបញ្ជាក់ការដើរកៀរគររបស់ក្រុមអតីតបក្សប្រឆាំង នេះ ជាយល់ច្រឡំយ៉ាងធំ និងមិនអាចទៅរួចនោះទេ ដែលចង់យកការគាបសង្កត់ការដាក់ ទណ្ឌកម្មមកធ្វើជាមធ្យោបាយសម្រាប់ឲ្យខ្លួនបានរស់ឡើងវិញនោះ។
ការលើកឡើងរបស់លោក សុខ ឥសាន បន្ទាប់ពីស្ថានការណ៍នៅក្រៅ ដែលជាប្រទេសមហាអំណាច ដូចសហភាពអឺរ៉ុប អាមេរិក បានព្រមានផ្តាច់ជំនួយ និងបិទទីផ្សារនាំចូលពីកម្ពុជា៕
