លោកស្រី ម៉េង សុភារី សហមេធាវីការពារក្ដីឲ្យលោក កឹម សុខា បានថាតុលាការកំពូលនឹងបើកសវនាការលើបណ្ដឹងសុំនៅក្រៅឃុំរបស់ប្រធានអតីតបក្សប្រឆាំងរូបនេះ នៅព្រឹកថ្ងៃទី៩ ខែមីនា ឆ្នាំ២០១៨ សប្តាហ៍ក្រោយ។
លោកស្រីបន្ថែមថាក្រុមមេធាវីនឹងទៅចូលរួមសវនាការនៅតុលាការកំពូលខាងមុខនេះ ដើម្បីស្នើសុំចៅក្រមដើម្បីអនុញ្ញាតឲ្យកូនក្ដីរបស់ពួកគាត់អាចនៅក្រៅឃុំ និងអាចទៅព្យាបាលជំងឺ ខណៈដែលបញ្ហាសុខភាពលោក កឹម សុខា កាន់តែទ្រុឌទ្រោមជាងមុន។
ពិតណាស់ ពួកយើងខ្ញុំនឹងទៅចូលរួមស្តាប់សវនាការ ពីព្រោះអីការសុំនៅក្រៅឃុំសំខាន់ ដោយសារមូលហេតុនៃការសុំនៅក្រៅឃុំ ព្រោះបញ្ហាសុខភាពហ្នឹងជាចម្បងតែម្ដង។ ដោយសាររឿងសុខភាពរបស់គាត់ (កឹម សុខា) កូនក្ដីរបស់យើងខ្ញុំ ក៏ទទូចស្នើសុំឲ្យតុលាការធ្វើការអនុញ្ញាតឲ្យគាត់បាននៅក្រៅឃុំ ដើម្បីគាត់បានទៅព្យាបាលជំងឺ។ នេះបើតាមប្រសាសន៍លោកស្រី ម៉េង សុភារី។
បើតាមមេធាវីលោក កឹម សុខា លើកឡើងថា កន្លងមកពួកគាត់បានស្នើសុំឲ្យតុលាការកំពូល បើកសវនាការពេលរសៀលវិញ បន្ទាប់ពីមានសំណើរបស់កូនក្ដី ប៉ុន្តែមិនមានការឆ្លើយតបឡើយ។
សូមរំលឹកថា កាលពីថ្ងៃទី១ ខែកុម្ភៈ ឆ្នាំ២០១៨ កន្លងទៅ ក្រោយបញ្ចប់សវនាការរបស់សាលាឧទ្ធរណ៍ មេធាវិការពារក្តីលោក កឹម សុខា បានប្រាប់ថាស្ថានភាពសុខភាពលោក កឹម សុខា ធ្លាក់ចុះខ្លាំងដោយសារតែជំងឺទឹកនោមផ្អែម គឺកម្រិតជាតិស្ករឡើងដល់ជាង៣០០។
