ភ្នំពេញៈ នៅវេលាម៉ោង៧៖២០នាទីព្រឹក ថ្ងៃទី២ ខែមីនានេះ ពិធីដង្ហែក្បួនអ្នកតាទ្រង់ទ្រាយធំ បានចាប់ផ្ដើមថ្ងៃដំបូង នៅបរិវេណជុំវិញផ្សារអូរឫស្សី។ គ្រប់អ្នកតា បានចូលសន្ថិតលើរូបស្នង(មនុស្ស) ហើយប្រជាជនខ្មែរ ជាប់សែស្រឡាយចិន ដែលជឿលើពិធីនេះ បានប្រមូលផ្ដុំគ្នាមកមើល និង បានសុំយ័ន ដែលមានប្រឡាក់ឈាម ក្រោយពីអ្នកតាអារអណ្ដាត ហើយផ្ដិតជាប់យ័នយកមកបិតមុខផ្ទះ ដែលគេមានជំនឿថា ការពារផ្ទះពីខ្មោចព្រាយបិសាច និងនាំមកនូវសេចក្ដីសុខ។
ពិធីហែអ្នកតា រួមនឹងការសម្ដែងម៉ុងសាយ របស់ជនជាតិចិន-វៀតណាម គឺស្រដៀងទៅនឹងពិធីរាំរបាំត្រុដិ ដែលជារបាំប្រពៃណីរបស់ខ្មែរ ដែលគេជឿថា ជួយដេញឧបទ្រពចេញពីផ្ទះ ហើយនាំយកមកវិញ នូវសេចក្ដីសុខ សប្បាយ និងរកស៊ីមានបាន។
ដោយឡែក ឆ្នាំនេះមានមនុស្សរាប់ពាន់នាក់ អមដោយរថយន្តជាច្រើនគ្រឿង ដែលដឹកអ្នកហែហមអ្នកតា បានតម្រៀបជាជួរខាងកើតផ្សារអូរឫស្សី ដែលធ្វើឲ្យចរាចរណ៍បានកកស្ទះចាប់ពីម៉ោង៧ព្រឹកនេះ រហូតទៅ និងមានសមត្ថកិច្ចជួយសម្រួលចរាចរណ៍នៅតាមផ្លូវផ្សេងៗផងដែរ។ ពិធីហែអ្នកតាគឺ មានរយៈពេល៣ថ្ងៃ គិតចាប់ពីថ្ងៃនេះ ដែលផ្ដើមចេញពីម្ដុំផ្សារអូរឫស្សី។
ប្រជាជនខ្មែរ ដែលមានសែស្រឡាយចិន ជឿលើពិធីនេះ ប្រាប់ Cam Post ថា នៅម្ដុំផ្សារអូរឫស្សី គឺជាបណ្ដុំអ្នកតាធំមួយដែរ ដូច្នេះហើយរាល់ឆ្នាំ ពិធីនេះ បានចាប់ផ្ដើមថ្ងៃដំបូងនៅទីនេះ។
អ្នកជាប់សែស្រឡាយចិន បងប្អូនអាជីវករមួយចំនួន កំពុងត្រៀមធូបទៀន និងក្រដាសសែន ផ្លែឈើសែន ព្រមទាំងទឹកមន្ត និងអាំងប៉ាវ ត្រៀមទទួលស្វាគមន៍អ្នកតា ដែលដើរចូលតាមផ្ទះ ហើយអ្នកតានឹងជួយប្រោះព្រំដល់ម្ចាស់ផ្ទះឲ្យមានសេចក្ដីសុខ រកស៊ីមានបាន នៅព្រឹកនេះផងដែរ៕
