
ក្រសួងព័ត៌មាន ដែលមានឯកឧត្តម ខៀវ កាញារីទ្ធ ជារដ្ឋមន្ត្រី បានផ្ញើលិខិតមួយច្បាប់ ចុះនៅថ្ងៃទី៣០ ខែមីនា ឆ្នាំ២០១៨ ឱ្យបញ្ឈប់ការចាក់ផ្សាយបទចម្រៀងមានចំណងថា៖ រាំស្តុប របស់ផលិតកម្មសាន់ដេ ដែលច្រៀងដោយតារាស្រីសិចស៊ី នាងយូរី។
ក្នុងលិខិតរបស់ក្រសួងព័ត៌មាននេះផ្ញើ ទៅម្ចាស់ស្ថានីយទូរទស្សន៍ និងទូរទស្សន៍គ្រប់ប្រព័ន្ធ និងម្ចាស់ទូរទស្សន៍អនឡាញគ្រប់ប្រភេទ បញ្ឈប់ការចាក់ផ្សាយ ដោយសារតែវីដេអូបទចម្រៀងនេះ បានប្រើស្លាកសញ្ញា (Logo) របស់មន្ទីរពេទ្យកាល់ម៉ែត ដោយគ្មានការអនុញ្ញាត។
លិខិតដដែលបានបញ្ជាក់ថា ផលិតកម្មសាន់ដេបានផលិតវីដេអូចម្រៀងនេះដែលនៅក្នុងឈុតសម្តែងបានប្រើប្រាស់ឯកសណ្ឋានដែលមានស្លាកសញ្ញារបស់មន្ទីរពេទ្យកាល់ម៉ែតដោយពុំមានការអនុញ្ញាត ពីមន្ទីរពេទ្យកាល់ម៉ែត ដែលធ្វើឲ្យប៉ះពាល់ដល់កិត្តិយស សេចក្តីថ្លៃថ្នូររបស់មន្ទីរពេទ្យ និងទឹកចិត្តក្នុងការបំពេញការងារវិជ្ជាជីវៈរបស់បុគ្គលិកនៃមន្ទីរពេទ្យកាល់ម៉ែតទាំងមូល។



ក្រសួងព័ត៌មាន ស្នើឲ្យម្ចាស់ស្ថានីយទាំងអស់អនុវត្តឲ្យមានប្រសិទ្ធភាពចាប់ពីថ្ងៃជូនដំណឹងនេះតទៅ។ សូមរំលឹកថា កាលពីឆ្នាំកន្លងទៅក្រសួងព័ត៌មានក៏ធ្លាប់ហាមការចាក់ផ្សាយបទចម្រៀងមួយចំនួនដែរ។
https://www.youtube.com/watch?v=BX6Qdp3YJ_I&app=desktop