
តាកែវៈ ក្រោយលោក ឡាយ វណ្ណៈ ត្រូវរដ្ឋាភិបាលបញ្ចប់មុខតំណែងពីអភិបាលខេត្តតាកែវមិនបានប៉ុន្មានថ្ងៃផងនោះ ពេលនេះលោកនឹងបងប្រុសបង្កើត ត្រូវបានគេទម្លាយរឿងជាបន្តបន្ទាប់ ក្នុងនោះមានទាំងរឿងបទល្មើសព្រហ្មទណ្ឌ និងអំពើពុករលួយជាដើម។
បន្ទាប់ពី ឡាយ វណ្ណៈ អភិបាលខេត្តតាកែវ ត្រូវរដ្ឋាភិបាលដកចេញពីតំណែង និងផ្ទេរមកកាន់ក្រសួងមហាផ្ទៃ ដោយគ្មានតួនាទីត្រឹមត្រូវ បងប្រុសរបស់លោកឈ្មោះ ឡាយ ធារិទ្ធ ដែលជាស្នងការរងនគរបាលខេត្តតាកែវ ទទួលបន្ទុកសេដ្ឋកិច្ច រួមនឹងមន្រ្តីជំនិតៗប្រមាណជិត១០នាក់ ត្រូវបានថ្នាក់លើហៅទៅសួរនាំអស់រយៈពេលជាច្រើនថ្ងៃ ជុំវិញករណីស្រ្តីម្នាក់ដែលគេអះអាងចងកសម្លាប់ខ្លួន នៅក្រុងដូនកែវ ក្រោយមកថ្នាក់លើក៏ឲ្យមកវិញ។

នៅពេលដែលសំណុំរឿងករណីចងកសម្លាប់ខ្លួនកំពុងតែដំណើរការស៊ើបអង្កេត ស្រាប់តែបងប្រុសលោក ឡាយ វណ្ណៈ ត្រូវបានគេទម្លាយរឿងថ្មីមួយទៀត ពាក់ព័ន្ធនឹងករណីទទួលសំណូកលុយល្បែងបញ្ជល់មាន់កូនប្រសារលោក ហ៊ុន សាន ឈ្មោះ ថៃ ផានី ហៅម៉ាប់អូស្រ្តាលី មុនពេលនាយករដ្ឋមន្រ្តីបញ្ជាឲ្យបង្រ្កាប។
យោងតាមឯកសារ ដែលអង្គភាពសារព័ត៌មាន Cam Post ទទួលបាន លោក ឡាយ ធារិទ្ធ ធ្លាប់ទទួលសំណូកលុយល្បែងបញ្ជល់មាន់១ខែរាប់ពាន់ដុល្លារ ក្រោយមកសម្តេចតេជោនាយករដ្ឋមន្រ្តី ក៏បានបញ្ជាឲ្យបង្រ្កាប រហូតបញ្ជាឲ្យបាញ់សម្លាប់លោក ថៃ ផានី ចោល ប្រសិនបើលោករារាំងចំណាត់ការរបស់សមត្ថកិច្ច ក្នុងការបង្រ្កាបសង្វៀនបញ្ជល់មាន់នៅស្រុកបាទី ខេត្តតាកែវ និងនៅអរិយក្សត្រ ខេត្តកណ្តាល ប៉ុន្តែក្រោយមកលោក ថៃ ផានី ក៏បានចូលខ្លួន និងបញ្ជូនទៅកាន់តុលាការចាត់ការតាមច្បាប់ផងដែរ។


សូមបញ្ជាក់ថា ក្រោយស្រ្តីមេម៉ាយកូនបីម្នាក់ ឈ្មោះ ចេវ សុវឌ្ឍនា អាយុ៣៦ឆ្នាំ មានទីលំនៅបច្ចុប្បន្ននៅបុរីប៉េងហួត ផ្លូវជាតិលេខ២ ដែលគេអះអាងថា បានចងកសម្លាប់ខ្លួននៅក្នុងផ្ទះវីឡាមួយកន្លែង ស្ថិតក្នុងភូមិផ្សារតាកោរ សង្កាត់រការក្នុង ក្រុងដូនកែវ ខេត្តតាកែវ កាលពីវេលាម៉ោង៧ និង៣០នាទីល្ងាច ថ្ងៃទី២៦ ខែមករា ឆ្នាំ២០១៨ ហើយនោះ ប៉ូលិសក្រសួងមហាផ្ទៃ ក៏បានបើកការស៊ើបអង្កេត រហូតឈានដល់ការកោះហៅលោក ឡាយ ធារិទ្ធ និងមន្រ្តីប្រមាណជិត១០នាក់ បន្ទាប់ពីលោក ឡាយ វណ្ណៈ ត្រូវដកចេញពីតំណែងអភិបាលខេត្តតាកែវ។ លើសពីលោក ឡាយ វណ្ណៈ ក៏ត្រូវបានគេបង្ហើបថា អាចជាប់ពាក់ព័ន្ធនឹងការស្លាប់ស្រ្តីមេម៉ាយរូបនោះផងដែរ៕
