ភ្នំពេញៈ មានហេតុការណ៍គ្រោះថ្នាក់ចរាចរណ៍ដ៏រន្ធត់មួយទៀតហើយ ដែលបណ្ដាលឲ្យបុរសម្នាក់ បានបោកបែកនឹងថ្នល់ធ្លាយខួរស្លាប់ យ៉ាងអាណោចអាធ័ម នៅកណ្ដាលទ្រូងផ្លូវ កាលពីវេលាម៉ោង២៖០០នាទីទាបភ្លឺ ថ្ងៃទី៨ ខែមីនា ឆ្នាំ២០១៨ នៅតាមបណ្ដោយផ្លូវជាតិលេខ១ ត្រង់ចំណុចមុខច្រកចូលមន្ទីរពេទ្យជោរៃភ្នំពេញ ក្នុងសង្កាត់និរោធន៍ ខណ្ឌច្បារអំពៅ រាជធានីភ្នំពេញ។
សមត្ថកិច្ចបានប្រាប់ឲ្យដឹងថា ជនរងគ្រោះមានឈ្មោះ សោម ស៊ីមន ភេទប្រុស អាយុ៣៨ឆ្នាំ មានទីលំនៅអចិន្ដ្រៃយ៍ ស្ថិតនៅក្នុងភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្ដាល បើកបរម៉ូតូ មួយគ្រឿង ម៉ាក Suzuki Smash ស៊េរីឆ្នាំ២០០៥ ពណ៌ខ្មៅ ពាក់ស្លាកលេខកណ្ដាល 1C-0155 ជាមធ្យោបាយក្នុងការធ្វើដំណើរ។
បើតាមសាក្សីដែលជាអ្នកឃើញហេតុការណ៍ផ្ទាល់ និងជាមិត្តភក្តិជនរងគ្រោះ ដែលបើកបរម៉ូតូមកតាមក្រោយ បានប្រាប់ឲ្យភ្នាក់ងារ CAM POST ដឹងថា ដំបូងឡើយកាលពីវេលាល្ងាចថ្ងៃទី៧ ខែមីនា ឆ្នាំ២០១៨ គាត់នឹងជនជនរងគ្រោះ បានទៅចូលរួមពិធីជប់លៀងនៅកន្លែងធ្វើការ រហូតទាល់តែកណ្ដាលអធ្រាត្រ ទើបត្រលប់ទៅផ្ទះវិញ ដោយបានជិះម៉ូតូរៀងខ្លួន ចំណែករូបគាត់ក៏បានជិះម៉ូតូមួយគ្រឿងទៀត តាមផ្លូវជាមួយគ្នាពីក្រោយម៉ូតូជនរងគ្រោះ លុះមកដល់កន្លែងកើតហេតុ ជាអកុសលស្រាប់តែជនរងគ្រោះ ដែលជិះម៉ូតូ Suzuki Smash ស៊េរីឆ្នាំ២០០៥ ពណ៌ខ្មៅ ក្នុងល្បឿនយ៉ាងលឿន ក៏រេចង្កូតទៅបុកខឿនពុះចែកទ្រូងផ្លូវ បណ្ដាលឲ្យបោកបែកពេញទំហឹងធ្លាយខួរស្លាប់ភ្លាមៗ នៅហ្នឹងកន្លែងកើតហេតុ គួរឲ្យអាសូរ។ ហើយគាត់ក៏បានទាក់ទងទៅប្រាប់សាច់ញាតិជនរងគ្រោះ ឲ្យបានដឹងភ្លាមៗតែម្ដង។
ក្រោយពីលឺដំណឹងដ៏រន្ធត់នេះភ្លាម បងប្អូនក្រុមគ្រួសារ ក៏បានធ្វើដំណើរមកដល់កន្លែងកើតហេតុ រត់ចុះមកស្រែកត្រហ៊ោយំក្ដុកក្ដួលក្នុងចិត្តគ្រប់ៗគ្នា សោកស្ដាយ អាឡោះអាល័យ ចំពោះការបាត់បង់សាច់ញាតិ ដោយសារតែគ្រោះថ្នាក់ចរាចរណ៍ដ៏រន្ធត់នៅលើដងផ្លូវបែបនេះ។
ក្រោយពេលកើតហេតុ កម្លាំងជំនាញចរាចរណ៍បានធ្វើការវាស់វែង រួចធ្វើកំណត់ហេតុប្រគល់សាកសពទៅឲ្យក្រុមគ្រួសារ ដើម្បីធ្វើបុណ្យតាមប្រពៃណីនៅផ្ទះ ស្ថិតនៅក្នុងភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្ដាល។
(សូមចូលរួមរំលែកទុក្ខដ៏ក្រៀមក្រំនេះផង និងចូលរួមគោរពច្បាប់ចរាចរណ៍ឲ្យបានត្រឹមត្រូវទាំងអស់គ្នា ដោយការគោរពរាប់អានពី CAM POST )៕
