
កាលពីថ្ងៃទី១៩ ខែមីនា ឆ្នាំ២០១៨ នៅក្នុងខេត្តកំពង់ឆ្នាំង នៅក្នុងកិច្ចប្រជុំផ្សព្វផ្សាយស្ដីពីកាតព្វកិច្ចធ្វើប័ណ្ណ និងសៀវភៅការការងាររបស់ជនបរទេសដែលកំពុងស្នាក់នៅ និងធ្វើការនៅក្នុងប្រទេសកម្ពុជា របស់អគ្គនាយកដ្ឋាន អន្ដោប្រវេសន៍ នៃក្រសួងមហាផ្ទៃ ជាមួយស្ថាប័នពាក់ពន្ធ័នានា លោក ឃុន សំបូន អគ្គនាយករងនៃអគ្គនាយកដ្ឋានអន្ដោប្រវេសន៍ បានឱ្យដឹងថា អគ្គនាយកដ្ឋាននឹងធ្វើអធិការកិច្ចដោយផ្ទាល់ជាមួយអាជ្ញាធរខេត្ត ស្រុក និងមន្ទីរពាក់ពន្ធ័ ចុះត្រួតពិនិត្យ ពលករ និងអ្នកធ្វើវិនិយោគបរទេស ដែលកំពុងស្នាក់នៅក្នុងប្រទេសកម្ពុជាចាប់ពីថ្ងៃទី០១ ខែឧសភា ឆ្នាំ២០១៨ តទៅ។
ទន្ទឹមនឹងនោះដែរ លោក ឈួរ ច័ន្ទឌឿន អភិបាលខេត្តកំពង់ឆ្នាំង ក៏បានសំណូមពរដល់មន្ត្រីរាជការពាក់ពន្ធ័ និងអាជ្ញាធរទាំងអស់ ត្រូវចូលរួមសហការជាមួយក្រុមការងារអធិការកិច្ចដែលបានចាត់តាំងក្នុងលិខិតបង្គាប់ការ ដើម្បីចូលរួមអនុវត្តច្បាប់នេះឱ្យមានប្រសិទ្ធភាពខ្ពស់ និងសូមកុំបន្តឱ្យមានកំហុសតទៅទៀត ដូចជា ការយកសេវាលើសច្បាប់កំណត់ ការចេញសំបុត្រកំណើត ឬអត្តសញ្ញាបណ្ណ័ឱ្យជនបរទេសជាដើម។
តាមច្បាប់អន្តោប្រវេសន៍របស់កម្ពុជា ជនបរទេសម្នាក់ៗដែលមកស្នាក់នៅធ្វើការត្រូវមានលិខិតឆ្លងដែន និងទិដ្ឋាការតាមការសុំស្នាក់នៅពី១ឆ្នាំដល់៣ឆ្នាំ ដោយមានកាត្វកិច្ចបង់ប្រាក់ចូលថវិកាជាតិក្នុងម្នាក់ៗចំនួន ១០០ដុល្លារក្នុង ១ឆ្នាំ។
លោកអគ្គនាយករងនៃអគ្គនាយកដ្ឋានអន្ដោប្រវេសន៍បានប្រាប់ថា៖ ពលករដែលកំពុងធ្វើការនៅក្នុងក្រុមហ៊ុន រោងចក្រ សហគ្រាសទាំងអស់ត្រូវត្រៀមឯកសារផ្ទាល់ខ្លួន មានលិខិតឆ្លងដែន ទិដ្ឋាការ និងមានសៀវភៅការងារ ដើម្បីការពារខ្លួន និងត្រូវបង្ហាញដល់ក្រុមការងារក្នុងពេលចុះធ្វើអធិការកិច្ច។ លោកពន្យល់ថា ក្នុងពេលចុះអធិការកិច្ច បើសង្ស័យក្រុមហ៊ុនណាមួយមានពលករបរទេសខុសច្បាប់ ឬមិនគោរពកាត្វកិច្ចនោះ លោកព្រះរាជអាជ្ញា នឹងចេញដីកាចុះឆែកឆេរភ្លាម ដើម្បីអនុវត្តច្បាប់ដោយតម្លាភាព និងមានប្រសិទ្ធភាព។ គោលបំណងនៃចុះអធិការកិច្ចរបស់ក្រសួងមហាផ្ទៃ គឺដើម្បីការពារសន្តិសុខជាតិ បង្កើនចំណូលថវិកាជាតិ ការពារផលប្រយោជន៍ស្របច្បាប់របស់ អ្នកវិនិយោគ និងពលករបរទេសដែលកំពុងធ្វើការងារនៅក្នុងប្រទេសកម្ពុជា។
យោងតាមច្បាប់ស្តីពីការច្បាប់អន្តោប្រវេសន៍ ចែងថា៖ ជនបរទេសដែលមិនគោរពកាត្វកិច្ចនៃច្បាប់អន្តោប្រវេសន៍ នឹងត្រូវធ្វើការផាកពិន័យប្រាក់ចំនួន ១២៥ដុល្លារ ហើយត្រូវចាប់បញ្ជូនទៅឲ្យក្រសួងការងារ និងកិច្ចសហប្រតិបត្តិការអន្តរជាតិនៃព្រះរាជាណាចក្រកម្ពុជា។ ចំណែកឯអ្នកមិនអនុវត្តច្បាប់ នឹងត្រូវធ្វើការបណ្ដេញចេញពីកម្ពុជា ដោយប្រកាសរបស់ក្រសួងមហាផ្ទៃ។ ចំពោះអ្នកគេចវេះនឹងត្រូវចាប់ខ្លួនដាក់ពន្ធនាគារពី ១ខែ ទៅដល់ ៦ខែ ហើយនឹងត្រូវបណ្តេញចេញពីកម្ពុជា។
