នៅសន្និសីទសារព័ត៌មាន កាលពីថ្ងៃទី០៦ ខែមីនា ឆ្នាំ២០១៨ ម្សិលមិញ លោក លូ កាង ( Lu Kang) អ្នកនាំពាក្យក្រសួងការបរទេសចិន បានបញ្ជាក់ពីជំហរជាថ្មីរបស់រដ្ឋាភិបាលចិនចំពោះវត្តមាននាវាដឹកហោះអាមេរិកមកកាន់វៀតណាមដែលជាភាគីជម្លោះអធិបតេយ្យសមុទ្រចិនខាងត្បូងរបស់ចិននោះ ថាមិនមែនជាការគំរាមកំហែងសន្តិសុខទៅលើចិននោះទេ។
អ្នកនាំពាក្យរូបនេះ បញ្ជាក់ថា៖ យើង(រដ្ឋាភិបាលចិន)គ្មានបញ្ហាអ្វីឡើយជាមួយនឹងបណ្តាប្រទេសពាក់ព័ន្ធ ដែលមានការអភិវឌ្ឍទំនាក់ទំនង និងកិច្ចសហប្រតិបត្តិការធម្មតាជាមួយនឹងគ្នានោះ។ យើងក៏សង្ឃឹមយ៉ាងមុតមាំថា កិច្ចសហប្រតិបត្តិការទាំងនោះ អាចចូលរួមរក្សាសន្តិភាព ស្ថិរភាព និងភាពរុងរឿងនៅក្នុងតំបន់។
រដ្ឋាភិបាលក្រុងប៉េកាំង ហាក់បង្ហាញជំហរស្ងៀមស្ងាត់មិនសូវជាអើពើចំពោះវត្តមានរបស់នាវាដឹកយន្តហោះរបស់រដ្ឋាភិបាលក្រុងវ៉ាស៊ីនតោននៅវៀតណាមជាលើកដំបូងប៉ុន្មានឡើយ។ សម្រាប់ក្រុងប៉េកាំង អ្វីដែលខ្លួនចង់ឃើញនោះ គឺការចូលរួមថែរក្សាសន្តិភាព និងសន្តិសុខនៅក្នុងតំបន់ពីបណ្តាប្រទេសទាំងអស់ ដោយមិនត្រឹមតែក្រុងវ៉ាស៊ីនតោននោះទេ។
តាមពិតទៅ នេះ មិនមែនជាលើកដំបូងឡើយ ដែលរដ្ឋាភិបាលក្រុងប៉េកាំង បង្ហាញជំហរមិនសូវដាក់ទម្ងន់លើវត្តមានយោធាអាមេរិកនៅវៀតណាម ពោលគឺ ជំហរនេះ ចិន ធ្លាប់បានបញ្ជាក់យ៉ាងដូច្នេះម្តងរួចហើយនៅពេលដែល អាមេរិក និងវៀតណាម បានព្រមព្រៀងគ្នាលើកដំបូងក្នុងការអនុញ្ញាតឲ្យនាវាដឹកយន្តហោះអាមេរិកទៅកាន់វៀតណាមនោះ ។
សូមបញ្ជាក់ថា កាលពីថ្ងៃ០៥ ខែមីនា ឆ្នាំ២០១៨ នាវាដឹកយន្តហោះចម្បាំងទម្ងន់ជាង១០ម៉ឺនតោន USS Carl Vinson បានចូលចតនៅកំពង់ផែដាណាង ប្រទេសវៀតណាម ។ នេះជាលើកដំបូងបំផុតហើយ ដែលនាវាដឹកយន្តហោះអាមេរិកមានវត្តមាននៅវៀតណាមរាប់ចាប់ពីសង្គ្រាមវៀតណាមបិទបញ្ចប់ទៅឆ្នាំ១៩៧៥។ យោងតាមការអះអាងរបស់មេបញ្ជាការកងនាវាចរណ៍របស់អាមេរិក គឺថាវត្តមានរបស់កងនាវាអាមេរិកនៅដែនទឹកវៀតណាមនេះបានឆ្លុះបញ្ចាំងពីការរីកចម្រើនលូតលាស់នៃកិច្ចសហប្រតិបត្តិការ និងភាពជាដៃគូរវាងវៀតណាម-អាមេរិក។
មួយរយៈចុងក្រោយនេះ សង្កេតឃើញថា កិច្ចសហប្រតិបត្តិការវៀតណាម-អាមេរិកមានភាពស្អិតរមួតគួរឱ្យកត់សម្គាល់។
