ពោធិ៍សាត់ៈ បុរសតណ្ហាក្រាស់ បានចាប់រំលោភក្មេងស្រីអាយុ១០ឆ្នាំ បានសម្រេចចំនួន៥ដង ទើបបែកការដល់ម្ដាយក្មេងស្រីរងគ្រោះប្ដឹងសមត្ថកិច្ចឲ្យចាប់ខ្លួន។
សមត្ថកិច្ច បានឲ្យដឹងថា យោងតាមពាក្យបណ្តឹងរបស់ឈ្មោះ ស៊ឹង សុមឿន ភេទស្រី អាយុ ៣៣ឆ្នាំ ជនជាតិខ្មែរ នៅភូមិបឹងស្មុគ ឃុំស្វាយស ស្រុកក្រគរ ខេត្តពោធិ៍សាត់ ជាម្ដាយក្មេងរងគ្រោះ បានប្តឹងឈ្មោះ ធៀង ធា ភេទប្រុស អាយុ២៩ឆ្នាំ ជនជាតិខ្មែរ នៅភូមិបឺងស្មុក ឃុំសា្វយស ស្រុកក្រគរ ខេត្តពោធិ៍សាត់ ពីបទរំលោភសេពសន្ថវទៅលើកូនស្រី របស់គាត់ ឈ្មោះ រ.ច.ម អាយុ១០ឆ្នាំ ជនជាតិខ្មែរកាលពីថ្ងៃទី២៤ ខែកុម្ភៈ ឆ្នាំ២០១៨ វេលាម៉ោង ៤រសៀល នៅចំណុចក្នុងព្រៃជាប់ស្រែ តា យឿន ខាងកើតផ្ទះចម្ងាយប្រហែល ២៧០ម៉ែត្រ ខណៈក្មេងស្រីរងគ្រោះទៅផ្លាស់ក្របីនៅទីនោះ។
អធិការនគរបាលស្រុកក្រគរ លោក ឯម រុន បានឲ្យដឹងថា ក្រោយទទួលបានពាក្យបណ្តឹង លោកនាយប៉ុស្តិ៍ស្វាយស បានរាយការមកលោក បញ្ជាកម្លាំងចុះទៅដល់កន្លែងកើតហេតុដើម្បីនាំខ្លួនជនសង្ស័យ មកសួរនាំនៅប៉ុស្តិ៍រដ្ឋបាលស្វាយស នៅចំពោះមុខសមត្ថកិច្ច ជនសង្ស័យមិនបានសារភាពនោះទេ។
តាមការបំភ្លឺរបស់ក្មេងរងគ្រោះ បានឲ្យដឹងថា ជនសង្ស័យឈ្មោះ ធៀង ធា បានធ្វើសកម្មភាពចាប់រំលោភមកលើរូបនាងចំនួន៥ដងហើយ ដោយនាងមិនហ៊ានប្រាប់ម្តាយទេ ព្រោះខ្លាចគាត់វាយ តាំងពីលើកទី១រហូតដល់ទៅ៤ លើក ទើបលើកទី៥ បានបែកការដល់ម្តាយរបស់នាងលួងលោមសួរទើបនាងប្រាប់ ម៉្យាងទៀតខ្លួនមានការភ័យខ្លាចពីការគំរាមកំហែងរបស់ជនសង្ស័យថា តែហ៊ានប្រាប់គេអញសម្លាប់ចោល ។
ក្មេងស្រីរងគ្រោះ បានបញ្ជាក់ថា ការរំលោភចំនួន៤ដងនោះ នាងមិនចាំ ថ្ងៃ.ខែ.ឆ្នាំ ទីកន្លែងដែលជនសង្ស័យយកទៅរំលោភនោះទេ ទើបតែលើកទី៥នេះទេ ទើបខ្លួនចាំថា នៅថ្ងៃទី២៤ ខែកុម្ភៈ ឆ្នាំ២០១៨ វេលាម៉ោង៤រសៀល ខណៈនាងបានទីផ្លាស់ក្របី ពេលនោះជនសង្ស័យបានបក់ដៃឲ្យនាងក៏ដើរទៅ ជនសង្ស័យបានចាប់ដៃនាងចូលក្នុងព្រៃម្តុំស្រែ តា យឿន ហើយចាប់ស្រាតខោធ្វើសកម្មភាពរំលោភតែម្ដង ។
បច្ចុប្បន្នជនសង្ស័យ សមត្ថកិច្ចបាននាំខ្លួនមកកាន់អធិការដ្ឋាននគរបាលស្រុក ដើម្បីសាកសួរ និងកសាងសំណុំរឿងចាត់ការបន្តតាមនីតិវិធីច្បាប់៕
