Sponsor
អាម៉ាប៉ាប៉ាញ៉ូស

ភ្នំពេញៈ បើទោះជាមានការទម្លាយរូបថតមួយចំនួន ពាក់ព័ន្ធនឹងជីវិតឯកជនរបស់តារាចម្រៀង ខេមរៈ សិរីមន្ត ដែលខំលួចលាក់អស់រាប់ឆ្នាំហើយក្ដី ក៏មហាជនអ្នកគាំទ្រនៅតែគាំទ្រដដែល ហាក់មិនរង្គោះរង្គើបន្តិចឡើយសោះ។

បើតាមប្រភព ដែលទម្លាយពីជីវិតឯកជនរបស់តារាលំដាប់ជួរមុខរូបនេះ បានលើកឡើងថា ទោះបីដឹងថា លោក ខេមរៈ សិរីមន្ត មានទាំងប្រពន្ធ និងកូន ដែលសាមីខ្លួនខំលាក់បាំងពីក្រសែភ្នែកមហាជនអស់រាប់ឆ្នាំ សម្រាប់មិត្តយុវវ័យ ក៏ដូចជាមជ្ឈដ្ឋានទូទៅយល់ថា គ្មានបញ្ហានោះទេ។ គ្មានបញ្ហា ព្រោះសមត្ថភាពរបស់តារាល្បី មិនស្ថិតលើរឿងមានគូមានកូនឡើយ។ ការធ្លាយរូបទាំងនេះ មិនអាចទាញទម្លាក់ប្រជាប្រិយភាពសាមីខ្លួនឲ្យដួលបាននោះទេ។

ប្រពន្ធ និងកូនរបស់តារាចម្រៀងល្បី​ឈ្មោះ ខេមរៈ សិរីមន្ត ត្រូវបានគេទម្លាយ​ដោយរូបថត​ជាច្រើន​សន្លឹក ដោយមានការ​ចែកចាយ​តៗគ្នាពេញបណ្ដាញសង្គម Facebook។ ការទម្លាយ​ឲ្យដឹងពីមុខមាត់​ប្រពន្ធ និងកូន​អតីតតារា​ចម្រៀងសាន់ដេរូបនេះ ខណៈលោក​បានលាក់បាំង​ជាយូរឆ្នាំ​មកហើយ​រឿងប្រពន្ធ​កូននេះ។

តាមប្រភព​សុំមិន​បញ្ចេញ​ឈ្មោះ បានប្រាប់ថា ហេតុផល​នាំឲ្យ ខេមរៈ សិរីមន្ត លាក់បាំង​ប្រពន្ធកូនកន្លងមក ព្រោះតែ​ខ្លាច​ធ្លាក់ប្រជា​ប្រិយភាព ប្រសិនបើ​បង្ហាញ​ទស្សនិកជនឲ្យដឹងថា ​លោកមាន​ប្រពន្ធ និងកូន​បែបនេះ។ ភរិយាតារាចម្រៀង​ប្រចាំ​ផលិត​កម្ម រស្មីហង្សមាស​រូបនេះ មានឈ្មោះ ផល្លី វ័យជាង៣០ឆ្នាំ ដែលមាន​ស្រុកកំណើតក្នុងទឹកដីខេត្ត​កំពង់ចាម ដូចលោក ខេមរៈ សិរីមន្ត។

ប្រភពដដែលបន្តថា អ្នកទាំង​ពីរ បាន​រៀបការជាច្រើន​ឆ្នាំមកហើយ ថែមទាំង​មានសំបុត្រ​អាពាហ៍ពិពាហ៍​ជាមួយគ្នា​ទៀត។ ហើយបច្ចុប្បន្នលោក ខេមរៈ សិរីមន្ត ទទួលបាន​កូន២នាក់ ប្រុស១ ស្រី១ កូនប្រុស​ឈ្មោះ ខេមរៈ មន្តស្នេហ៍ វ័យប្រហែល​៥ឆ្នាំ និងកូនស្រី​ឈ្មោះ ខេមរៈ ស្ត្រី វ័យជាង​២ឆ្នាំ។ តាំងពីរៀបការ​មក លោក ខេមរៈ សិរីមន្ត មិនឲ្យភរិយា​របស់លោក​ធ្វើអ្វីឡើយ គឺឲ្យនៅតែ​ផ្ទះចាំ​មើលតែថែកូន ដែលផ្ទះ​របស់លោក ស្ថិតនៅទល់​មុខវត្តសំរោង​អណ្ដែត៕

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post
Sponsor