
រតនគិរីៈ អធិការនគរបាលស្រុកកូនមុំ លោក ភោគ បូរិទ្ធ ត្រូវបានគេនិយាយថា សម្បូររឿងច្រើនជាងគេ មានទាំងការសម្របសម្រួលជំនួសតុលាការ អ្នកទោសលួចរត់ពីកន្លែងឃុំខ្លួន ហើយនឹងករណីទទួលសំណូកប្រយោជន៍ប្រចាំខែ ប៉ុន្តែត្រង់ចំណុចនេះ ត្រូវបានលោកអធិការបដិសេធ ប៉ុន្តែលោកក៏ទទួលស្គាល់ដែរថា ពិតជាមានការសម្របសម្រួលរឿងខ្លះមែន។
ថ្លែងបញ្ជាក់ប្រាប់ អង្គភាពសារព័ត៌មាន CAM POST កាលពីរសៀលថ្ងៃទី៣០ មីនា ២០១៨ អធិការនគរបាលស្រុកកូនមុំ លោក ភោគ បូរិទ្ធ បានឲ្យដឹងថា លោកសប្បាយចិត្តដែលគេចោទថា លោកជាអ្នកដើរសម្របសម្រួលជំនួសតុលាការ ពីព្រោះលោកជាមនុស្សស្អាតស្អំមិនដែលបំពានច្បាប់ឡើយ។ ប៉ុន្តែលោកក៏ទទួលស្គាល់ថា កន្លងមកលោកពិតជាបានសម្របសម្រួលខ្លះមែន ក្នុងករណីថ្នាក់លើ ឬតុលាការឯកភាព។
ជាក់ស្តែងថ្មីៗនេះមានរឿងថ្មីមួយទៀត គឺករណីជាប់សង្ស័យថា រំលោភក្មេងស្រី អាយុ៨ឆ្នាំ រឿងនេះ ត្រូវប៉ូលិសចាប់ខ្លួនជនសង្ស័យ ប៉ុន្តែក្រោយមកជនសង្ស័យក៏បានលួចរត់ចេញពីកន្លែងឃុំខ្លួនក្នុងអធិការដ្ឋាននគរបាលស្រុកកូនមុំ បន្ទាប់មកក៏ត្រូវចាប់បានមកវិញ។
ជនសង្ស័យម្នាក់ ឈ្មោះ សំ សុភី ភេទប្រុស អាយុ៣៥ឆ្នាំ ជនជាតិខ្មែរ មានទីលំនៅភូមិមួយ ឃុំត្រពាំងច្រេស ស្រុកកូនមុំ ខេត្តរតនគីរី ត្រូវនគរបាលចាប់ឃាត់ខ្លួន នៅម៉ោង៣រសៀលថ្ងៃពុធ ១២កើត ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៨ ខែមីនា ឆ្នាំ២០១៨ ស្ថិតនៅក្នុងភូមិមួយ ឃុំត្រពាំងច្រេស ស្រុកកូនមុំ ខេត្តរតនគិរី ពាក់ព័ន្ធករណីរំលោភសេពសន្ថវលើក្មេងស្រីឈ្មោះ ក.ច.ត អាយុ៨ឆ្នាំ ។

តាមប្រភពព័ត៌មានច្បាស់ការបានឲ្យ CAM POST ដឹងថា មកទល់នឹងពេលនេះ មាន៤ករណី រួចមកហើយ ដែលគេបានទម្លាយថា មានជនសង្ស័យបានលួចរត់ចេញពីមន្ទីរឃុំឃាំងនៅអធិការដ្ឋាននគរបាលស្រុកកូនមុំ។
ប្រភពបានបន្តថា មានរឿងថ្មីមួយទៀតហើយ ចាប់បានជនសង្ស័យករណីរំលោភក្មេងស្រីអាយុ៨ឆ្នាំ មិនទាន់គ្រប់អាយុនៅឡើយ ត្រូវបានលួចរត់ចេញពីមន្ទីរឃុំឃាំង កាលពីយប់ម៉ោង១រំលងអធ្រាត្រឈានចូលថ្ងៃទី៣១ មីនានេះ ប៉ុន្តែត្រូវចាប់បានមកវិញនៅម៉ោងជាង១១ថ្ងៃត្រង់។
លោក ភោគ បូរិទ្ធ បន្តថា ក្រោយឃាត់ខ្លួនជនសង្ស័យដាក់ខ្នោះជើង រូបគេក៏បានរត់គេចខណៈមន្រ្តីប៉ូលិសដោះដូរ ឬបន្ធូរខ្នោះ តែត្រូវចាប់បានមកវិញ។

តាមការបំភ្លឺពីក្មេងរងគ្រោះថា ជនសង្ស័យបានរំលោភចំនួន៣ខែកន្លងមកហើយ បានចំនួន៤ដង(សម្រេច) ប៉ុន្តែក្មេងស្រីមិនហ៊ានប្រាប់ឪពុកម្តាយនោះទេ ទើបដល់ថ្ងៃទី២៨ ខែមីនា ឆ្នាំ២០១៨ នៅវេលាម៉ោង៣រសៀល ទើបបានប្រាប់ម្តាយ ភ្លាមនោះម្តាយបានតេទៅនគរបាលប៉ុស្តិ៍មូលដ្ឋាន ថាគេបានចាប់រំលោភកូនស្រីរបស់ខ្លួន បន្ទាប់មកកម្លាំងនគរបាលប៉ុស្តិ៍បានចុះទៅដល់ផ្ទះជនរងគ្រោះនិងធ្វើការបំភ្លឺពីក្មេងស្រីរងគ្រោះហើយបានតាមចាប់ជនសង្ស័យយកមកអធិការដ្ឋាននគរបាលស្រុកកូនមុំ ដើម្បីសួរនាំ។
បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលស្រុកកូនមុំដើម្បីកសាងសំណុំរឿងបញ្ជូនទៅអយ្យការសាលាដំបូងខេត្តចាត់ការតាមនិតិវិធីច្បាប់៕
