ភ្នំពេញៈ នារីម្នាក់ បានជិះម៉ូតូ TODAY ពណ៌ពងមាន់ ធ្លាក់ជង្ហុកដួលផ្កាប់មុខ បណ្ដាលឲ្យសន្លប់ស្ដូកស្ដឹង ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះភ្លាមៗផងដែរ។ ហេតុការណ៍នេះ កើតឡើងកាលពីវេលាម៉ោង៤ទៀបភ្លឺ ថ្ងៃពុធ ១៥កើត ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១ ខែមីនា ឆ្នាំ២០១៨នេះ នៅលើផ្លូវលេខ១៤៨ ស្ថិតក្នុងសង្កាត់ផ្សារកណ្ដាលទី១ ខណ្ឌដូនពេញ រាជធានីភ្នំពេញ។
សាក្សីដែលឃើញហេតុការណ៍ ប្រាប់ភ្នាក់ងារ Cam Post ឲ្យដឹងថា នៅមុនពេលកើតហេតុ គេឃើញនារីម្នាក់ ជិះម៉ូតូម៉ាក TODAY ពណ៌ពងមាន់ មិនចាំស្លាកលេខ ក្នុងទិសដៅពីកើតទៅលិច តាមបណ្ដោយផ្លូវលេខ១៤៨។ លុះមកដល់កន្លែងកើតហេតុ ម៉ូតូបានធ្លាក់ជង្ហុកតូចមួយ បណ្ដាលឲ្យដួលផ្កាប់មុខអូសនឹងថ្នល់ បែកមុខបែកមាត់ សន្លប់ស្ដូកស្ដឹងនៅហ្នឹងកន្លែងតែម្ដង។
ភ្លាមនោះ នគរបាលល្បាប៉ុស្តិ៍ផ្សារកណ្ដាលទី១ បានចុះមកដល់កន្លែងកើតហេតុ ហើយហៅរថយន្តសង្គ្រោះបន្ទាន់មកដឹកទៅសង្គ្រោះនៅឯមន្ទីរពេទ្យភ្លាមៗផងដែរ។ ចំណែកឯម៉ូតូ ត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលសង្កាត់ផ្សារកណ្ដាលទី១ រងចាំសាច់ញាតិ និងក្រុមគ្រួសារយករក្សាទៅយក។
បច្ចុប្បន្ននារីរងគ្រោះខាងលើ មិនទាន់ស្គាល់អត្តសញ្ញាណនៅឡើយទេ ដែលនាងមានពាក់នាឡិកា និងមានសាក់អក្សរអង់គ្លេស (Just Love) ត្រូវបានរថយន្តគិលានសង្គ្រោះគ្លីនិកឯកជន ហុង ហាក់ ដឹកយកទៅសង្គ្រោះភ្លាមៗផងដែរ។ សូមជួយចែករំលែកបន្តគ្នា ដើម្បីរកសាច់ញាតិរបស់នាង៕
