តំបន់ត្រីកោណអភិវឌ្ឍន៍កម្ពុជា ឡាវ វៀតណាម ជាតំបន់ដែលមានព្រំដែនជាប់គ្នា នៃខេត្តចំនួន១៣ នៃប្រទេសទាំងបី ក្នុងនោះប្រទេសកម្ពុជាមានខេត្ត៤៖ ខេត្តស្ទឹងត្រែង រតនគិរី មណ្ឌលគិរី និង ខេត្តក្រចេះ ចំណែកឯប្រទេសឡាវ មានខេត្តចំនួន៤ ដែរ៖ ខេត្តអាតាពូ សាឡាវ៉ាន់ សេកុង និង ខេត្តចំប៉ាសាក់ ដោយឡែក ប្រទេសវៀតណាមមានខេត្តចំនួន៥៖ ខេត្តកុនទុម ហ្កាឡាយ ដាក់ឡាក់ ដាក់ណុង និង ប៊ីងភឿក។ ទាក់ទងនឹងតំបន់អភិវឌ្ឍន៍ត្រីកោណនេះ លោក ពេជ្រ ស្រស់ ប្រធានគណបក្សយុវជនកម្ពុជា មានរិះគន់ចំៗទៅលើប្រទេសវៀតណាម តាមរយៈគេហទំព័រហ្វេសប៊ុកថា៖ ការវិនិយោគជាមួយក្រពើ កម្ពុជាមិនគួរដាក់ទុនរកស៊ីជាមួយនោះឡើយ.......!
លោក ពេជ្រ ស្រស់ រំលឹកថា៖ នៅក្នុងប្រវត្តិសាស្រ្តប្រទេសកម្ពុជាបានបាត់ព្រៃគ ”ហៅព្រៃនគរ” និងកំពង់ផែគុជខៀវ ដោយបច្ចុប្បន្នមានឈ្មោះថាទីក្រុង Saigon នោះ គឺដោយសារតែចរន្តនយោបាយត្រជាក់ពីម្តាយក្មេកមានសាសន៍ផ្ទុយពីខ្មែរ គឺដាយវៀត បច្ចុប្បន្ន វៀតណាម ហើយមិនត្រឹមតែក្នុងប្រវត្តិសាស្រ្តទេនៅក្នុងយុគសម័យនៃសម្តេចសីហនុ ព្រះអង្គក៏មានបន្ទូលដែរថា កុំទុកចិត្តសត្វក្រពើ ហើយព្រះអង្គក៏មានព្រះរាជសារផ្តាំផ្ញើរបន្ថែមទៀតថា”យួនគឺក្រពើវង្វេងបឹង” ព្រះរាជសាររបស់ព្រះអង្គ ដែលព្រះអង្គបានប្រទានចេញមកនេះគឺដោយសារតែព្រះអង្គធ្លាប់ជួយប្រទេសយួនស្ទើរតែបាត់បង់ព្រះរាជបាល័ង្គរបស់ព្ររះអង្គ ប៉ុន្តែចុងក្រោយយួនបានក្បត់នឹងព្រះអង្គធ្វើឲ្យព្រះអង្គឈឺព្រះហរទ័យយ៉ាងខ្លាំង ស្ទើរតែក្អួតព្រះលោហិត។
ប្រធានបក្សរូបនេះសួរថា៖ ចុះហេតុអ្វីបានជាមេដឹកនាំខ្មែរជំនាន់ក្រោយហ៊ានដាក់ទុនជាមួយសត្វក្រពើទៀត បើឪពុកធ្លាប់ខាតបង់យ៉ាងធ្ងន់ធ្ងរម្តងរួចហើយនោះ..? បើប្រទេសកម្ពុជាមិនប្រយត្ន័ទេនោះ ប្រទេសកម្ពុជានឹងបន្តបាត់បង់ខេត្តដែលបានបណ្តាក់ទុនជាមួយនឹងសត្វក្រពើជាក់ជាមិនខានឡើយ...។ ហើយអ្នកណាដែលហ៊ានចុះកិច្ចសន្យាបណ្តាក់ទុនជាមួយក្រពើនោះនឹងក្លាយខ្លួនជាជនក្បត់ជាតិនៅក្នុងប្រវត្តិសាស្រ្តសម័យថ្មីជាមិនខានឡើយ។
សូមរំលឹកថា ៣០-៣១ ខែមីនា ឆ្នាំ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញដឹកនាំគណៈប្រតិភូជាន់ខ្ពស់ អញ្ញើញទៅដល់ទីក្រុងហាណូយ ប្រទេសវៀតណាម ដោយសុវត្តិភាព ដើម្បីចូលរួមកិច្ចប្រជុំកំពូលមហាអនុតំបន់មេគង្គ (GMS) លើកទី៦ និងកិច្ចប្រជុំកំពូល កម្ពុជា-ឡាវ-វៀតណាម លើកទី១០ នៅប្រទេសវៀតណាម។
