Loading...

Monday, April 9, 2018

លោក មុត ចាន់ថា៖ ដំណើរទស្សនកិច្ចរបស់រដ្ឋមន្រ្តីការបរទេសជប៉ុនមកកម្ពុជា មានគោលបំណងសំខាន់២

រិទ្ធី

ជំនួយការលោក កឹម សុខា គឺលោក មុត​ ចាន់ថា បានសរសេរក្នុងហ្វេសប៊ុកថា៖ ដំណើរទស្សនកិច្ចរបស់រដ្ឋមន្រ្តីការបរទេសជប៉ុន លោក Taro Kono កាលពីថ្ងៃអាទិត្យ ទី០៨ ខែមេសា ឆ្នាំ២០១៨ ម្សិលមិញ គោលបំណងសំខាន់ពីរ គឺ៖ ទី១. ការចុះហត្ថលេខាលើកិច្ចព្រមព្រៀង ស្តីពីជំនួយហិរញ្ញវត្ថុ និង ទី២. ការស្តារលទ្ធិប្រជាធិបតេយ្យនៅកម្ពុជា ដោយផ្តោតជាសំខាន់លើការបោះឆ្នោតដោយសេរី ត្រឹមត្រូវ យុត្តិធម៌ ប្រជាធិបតេយ្យ និងមានការចូលរួមពេញលេញ។ ចំណុចសំខាន់ ការចូលរួមរបស់គណបក្សប្រឆាំង(គណបក្សសង្គ្រោះជាតិ)ពិតប្រាកដ ជាការចាំបាច់។

លោក មុត​ ចាន់ថា បន្តថា ជប៉ុនបានបញ្ជាក់គោលជំហរនយោបាយច្បាស់ បើសិនជាបក្សប្រឆាំងមិនត្រូវបានបង្កលក្ខណៈសមស្របអោយចូលរួមទេនោះ។ គួរកត់សម្គាល់ថា កញ្ញា កឹម មនោវិទ្យា បានទៅបំពេញទស្សនកិច្ចនៅប្រទេសជប៉ុន កាលពីដើមខែមេសា ឆ្នាំ២០១៨ ដោយបានផ្តល់សក្ខីកម្មនៅរដ្ឋសភា និងព្រឹទ្ធសភា ព្រមទាំងតំណាងរាជរដ្ឋាភិបាលជប៉ុន។ លោករដ្ឋមន្រ្តីការបរទេសបានសន្យាប្រើប្រាស់ឥទ្ធិពលជប៉ុន ដើម្បីស្វែងរកដំណោះស្រាយនយោបាយចំពោះវិបត្តិនយោបាយនៅកម្ពុជា។

ដោយឡែកបើយោងតាមគេហទំព័រហ្វេសប៊ុក សម្តេច ហ៊ុន​ សែន បានឱ្យដឹងថា៖ បន្ទាប់ពីកិច្ចពិភាក្សារួច សម្តេចតេជោ ហ៊ុន សែន បានអញ្ជើញជាអធិបតីក្នុងពិធីចុះហត្ថលេខារវាង ឯកឧត្តម ប្រាក់ សុខុន ទេសរដ្ឋមន្ត្រី រដ្ឋមន្រ្តីក្រសួងការបរទេស និង លោក Taro Kono ស្ដីពីការផ្ដល់ហិរញ្ញប្បទានរបស់រដ្ឋាភិបាលជប៉ុនមកកាន់រាជរដ្ឋាភិបាលកម្ពុជាលើលិខិតប្ដូរសារនិងកំណត់ហេតុនៃការពិភាក្សាស្ដីពីការផ្ដល់ហិរញ្ញប្បទានរបស់រដ្ឋាភិបាលជប៉ុនមកកាន់រាជរដ្ឋាភិបាលកម្ពុជា ដូចខាងក្រោម៖

១- ហិរញ្ញប្បទានឥតសំណងជប៉ុន ដែលមានទឹកប្រាក់សរុបចំនួន ៥០០ លានយ៉េន (¥៥០០,០០០,០០០) សម្រាប់អនុវត្តគម្រោងកម្មវិធីអភិវឌ្ឍន៍សេដ្ឋកិច្ច និងសង្គម នៅកម្ពុជា

២- ឥណទានសម្បទានជប៉ុន ដែលមានទឹកប្រាក់សរុបចំនួន ៩.២១៦ លានយ៉េន (¥៩,២១៦,០០០,០០០) សម្រាប់អនុវត្តគម្រោងពង្រីកប្រព័ន្ធខ្សែបញ្ជូន និងចែកចាយអគ្គិសនី នៅរាជធានីភ្នំពេញ ជំហានទី២។ ក្រោយពីអញ្ជើញជាអធិបតីក្នុងពិធីចុះហត្ថលេខាហើយ សម្តេចតេជោ ហ៊ុន សែន និងលោករដ្ឋមន្រ្តីការបរទេសជប៉ុន បានអញ្ជើញពិសារអាហារពេលថ្ងៃត្រង់នៅវិមានសន្តិភាពប្រកបដោយភាពស្និទ្ឋស្នាលក្រៃលែង៕

@Amapapa.News

Feature Ads