Thursday, April 5, 2018

ស្រវឹងស្រាបើករថយន្ត ឡិចស៊ីស៤៧០ បុករថយន្តដឹកទំនិញទាំងកំរោល បែរសមត្ថកិច្ចឲ្យសម្រួលស្មើគ្នា?

អាម៉ាប៉ាប៉ាញ៉ូស

ភ្នំពេញៈ បុរស​ម្នាក់ ចេញពី​ផឹក​ស៊ីវិញ​ ស្រវឹង​ទោរទន់ បានបើករថយន្ត​ LEXUS 470 ​ក្នុងល្បឿន​លឿន​ ព្រមទាំង​ទាំង​ខ្វះ​ការប្រុង​ប្រយ័ត្នជ្រុលទៅបុករថយន្ត​យីឌុប​ ដឹក​ទំនិញ​ចំពីក្រោយ​ពេញទំហឹង បណ្តាលឲ្យ​រងការខូចខាត​យ៉ាងដំណំ។ ចំណែក​មនុស្ស​រងរបួស​តិចតួច។

ហេតុការណ៍គ្រោះថ្នាក់ចរាចរណ៍នេះ កើតឡើង​នៅ​វេលាម៉ោង​១០៖៣០នាទី​យប់ ថ្ងៃពុធ ៤រោច ខែចេត្រ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី​៤ ខែ​មេសា​ ឆ្នាំ​២០១៨​ ត្រង់ចំណុចស្ពានដែកចំការដូង ផ្លូវ​២១៧​ កែង​​ផ្លូវ​៣៧១ ស្ថិតភូមិម័ល​ សង្កាត់ដង្កោ​ ខណ្ឌដង្កោ​ រាជធានីភ្នំពេញ។

សាក្សីដែលឃើញហេតុការណ៍ផ្ទាល់ ប្រាប់ភ្នាក់ងារ​សារព័ត៌មាន Cam Post ឲ្យដឹងថា នៅមុនពេលកើតហេតុ​ គេបានឃើញបុរស​ម្នាក់ មានវ័យប្រហែល​ជាង​៣០ឆ្នាំ បើក​រថយន្ត​ប្រភេទ​យីឌុប​ ដឹក​ទំនិញ​ម៉ាក ​ហ៊ីយ៉ាន់ដាយ ពណ៌ស ពាក់ស្លាកលេខ ព្រះ​សីហនុ​ 3A-3945​ ​ធ្វើដំណើរតាមផ្លូវ២១៧​ ក្នុង​ទិសដៅពី​ត្បូងទៅជើង​។ ខណៈមកដល់​ចំណុចកើត​ហេតុ​ ផ្លូវ​បំបែកជា​បួន រថយន្ត​បាន​បន្ថយ​ល្បឿន​តិចៗ​ ស្រប​ពេលនោះ ស្រាប់តែ​បុរស​ម្នាក់ វ័យប្រហែល​ជាង​៤០ឆ្នាំ​ មិន​ដឹងថា ​ចេញពីផឹក​ស៊ីវិញ​នៅ​កន្លែង​ណានោះទេ គឺបាន​បើក​រថយន្ត​ម៉ាក​ LEXUS-470 ព​ណ៌​ស្ករ​ ពាក់ស្លាកលេខ​ ភ្នំពេញ​ 2N-0588 បាន​ធ្វើដំណើរតាម​ផ្លូវ២១៧ ​ក្នុង​ទិសដៅ​ស្របគ្នា​ ព្រម​ទាំង​ល្បឿនលឿន​ផងនោះ​ បានជ្រុលទៅបុក​នឹង​រថយន្ត​​​ដឹកទំនិញពីក្រោយ​ពេញទំហឹង​ បណ្តាល​ឲ្យរថយន្ត ឡិចស៊ីស​ រងការខូចខាត​​ផ្នែក​ខាង​មុខ​ និង​ធ្វើឲ្យអ្នក​បើក​រងរបួស​បែកក្បាល​បន្តិច​បន្តួច។ ដោយឡែក ​រថយន្ត​ដឹកទំនិញវិញ ​រងការខូចខាត​កាងខាងក្រោយ​បន្តិច​បន្តួច​តែប៉ុណ្ណោះ។

ក្រោយពេលកើតហេតុ ​សមត្ថកិច្ចជំនាញខណ្ឌ​ និង​ក្រុង បានចុះ​ទៅកន្លែងកើតហេតុ​ តែមិន​បានឃាត់​បុរស​ដែលស្រវឹង​ទោរទន់​នោះទេ​ គឺឲ្យ​តំណាង​ភាគីទាំង​សងខាង​ ធ្វើការសម្របសម្រួល ដោយ​សុំស្មើគ្នា​ ហើយ​យក​រថយន្ត​ទៅ​ជួសជួល​រៀង​ៗខ្លួន​។

ករណីនេះផងដែរ បងប្អូន​ប្រជាពលរដ្ឋ​ ដែល​ឃើញ​ហេតុការណ៍​ បានរិះ​គន់​សមត្ថកិច្ច​ជំនាញ​ក្រុង​ រឿង​មិន​ឃាត់​ខ្លួន​បុរស​ដែល​បើក​រថយន្តទាំងសភាពស្រវឹងទោរទន់ ទៅ​បុក​គេនោះ គឺទុកឲ្យ​បុរស​រូបនោះ ​ដោះ​ស្រាយ​ដោយ​ងាយស្រួល​បែបនេះ​។ ​ពួក​គាត់​បានស្នើឲ្យសមត្ថកិច្ច​ធ្វើការត្រួត​ពិនិត្យ​ជាតិ​ស្រវឹង​ទៀត​ ​ព្រោះ​ថា ករណី​មនុស្ស​ស្រវឹង​បង្ក​គ្រោះថ្នាក់​ចរាចរណ៍​មិន​ព្រម​ឃាត់ បែរ​ជានាំ​គ្នា​ឃាត់​អ្នក​ដែល​ស្រវឹង​ដែល​ធ្វើដំណើរ​តាមផ្លូវបន្តិច​បន្តួច​ទៅវិញ៕

@Amapapa.News