
ភ្នំពេញៈ រឿងដែលគេចាប់អារម្មណ៍ កាលពីថ្ងៃសៅរ៍ម្សិលមិញនៅជាយក្រុងភ្នំពេញ ជុំវិញករណីផ្ទុះអាវុធជាច្រើនគ្រាប់ ចេញពីភូមិគ្រឹះឧត្តមសេនីយ៍ផ្កាយ៣ នៅជួរកងអង្គរក្ស ដែលមានងារជាឧកញ៉ា ពេលនេះត្រូវបានលាតត្រដាងហើយ។
លោកឧត្តមសេនីយ៍ផ្កាយ៣ នៅបញ្ជាការដ្ឋានកងអង្គរក្ស ដែលមានងារជាឧកញ៉ា ទើបនឹងតែងតាំងកាលពីពេលថ្មីៗ បានប្រាប់ថា លោកមិនបានបាញ់នៅក្នុងភូមិគ្រឹះឡើយ ហើយរឿងនេះ គឺជារឿងក្នុងគ្រួសារ។
ថ្លែងបញ្ជាក់ប្រាប់អង្គភាពសារព័ត៌មាន CAM POST នៅព្រឹកថ្ងៃអាទិត្យ ៨កើត ខែពិសាខ ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី២២ ខែមេសា ឆ្នាំ២០១៨ លោក ឧកញ៉ា ហូ ចំរើន បានឲ្យដឹងថា ការផ្សាយរបស់ប្រព័ន្ធផ្សព្វផ្សាយ មួយចំនួន នៅមិនទាន់ជ្រាបច្បាស់ពីហេតុការណ៍ ហើយចេះតែចុះ ដែលនាំឲ្យបញ្ហាដំណឹងមិនពិតនេះ កាន់តែរីកទៅៗ។

គួរបញ្ជាក់ថា កាលពីវេលាម៉ោង៣៖៣៥នាទីរសៀល ថ្ងៃសៅរ៍ ៧កើត ខែពិសាខ ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី២១ ខែមេសា ឆ្នាំ២០១៨ មានហេតុការណ៍ភ្ញាក់ផ្អើលមួយបានកើតឡើងនៅចំណុចផ្ទះវីឡាគ្មានលេខ ស្ថិតក្នុងភូមិព្រៃសកើត សង្កាត់ព្រៃស ខណ្ឌដង្កោ រាជធានីភ្នំពេញ បន្ទាប់ពីមានករណីផ្ទុះអាវុធប្រហែល៦-៧គ្រាប់ នៅក្នុងផ្ទះ ឧកញ៉ា ហូ ចំរើន ។
របាយការណ៍សមត្ថកិច្ចសន្និដ្ឋានថា ឧកញ៉ា ហូ ចំរើន ជាអ្នកបាញ់ ហើយនៅក្នុងហេតុការណ៍នោះមានមនុស្ស៣នាក់ជាជនរងគ្រោះ ១-ឈ្មោះ យិន គារ ភេទប្រុស អាយុ៥៦ឆ្នាំ, ទី២-ឈ្មោះ ផន ទៀង ភេទស្រី អាយុ៥១ឆ្នាំ និងទី៣-ឈ្មោះ គារ សុខគាង ភេទស្រី អាយុ១៩ឆ្នាំ (ភរិយា)។ ជនរងគ្រោះទាំង៣ ស្នាក់នៅទីតាំងកើតហេតុខាងលើ។

សូមជម្រាបថា កាលពីថ្ងៃទី១៥ ខែមេសា ឆ្នាំ២០១៨កន្លងទៅថ្មីៗនេះ លោកឧកញ៉ា ហូ ចំរើន និងលោកស្រី គា សុខគាង ទើបតែត្រូវបានព្រះករុណា ព្រះមហាក្សត្រ ចេញព្រះរាជក្រឹត្យ ត្រាស់បង្គាប់តែងតាំងជាឧកញ៉ាទាំងរូបលោក និងភរិយាតែម្ដង៕








