
នៅរសៀលថ្ងៃទី០១ ខែមេសា ឆ្នាំ២០១៨នេះ លោកឧបនាយករដ្ឋមន្ត្រី ប៊ិន ឈិន រដ្ឋមន្ត្រីស្តីទី ទទួលបន្ទុកទីស្តីការគណៈរដ្ឋមន្ត្រី បានអញ្ជើញជាអធិបតីភាព ក្នុងពិធីប្រកាសផ្ទេរភារកិច្ច និងតែងតាំងប្រធានគណបក្សប្រជាជនកម្ពុជា ខេត្តតាកែវថ្មី ដោយប្រធានចាស់ គឺលោក ឡាយ វណ្ណៈ ត្រូវបានផ្លាស់ប្តូរចេញ ជំនួសវិញដោយ លោក អ៊ូច ភា។

ក្រោយពិធីប្រកាសផ្ទេរភារកិច្ចចប់ លោក ឡាយ វណ្ណៈ អតីតអភិបាលខេត្តតាកែវ ត្រូវបានកម្លាំងនគរបាលព្រហ្មទណ្ឌក្រសួងមហាផ្ទៃ ដោយស្លៀកពាក់ស៊ីវិល ចាប់រុញចូលរថយន្តស៊ែរីទំនើប រួចដឹកចេញយ៉ាងប្រញ៉ាប់ ឆ្ពោះមករាជធានីភ្នំពេញ នាវេលាម៉ោង ១៥ និង៤០នាទី ថ្ងៃទី០១ ខែមេសា ឆ្នាំ២០១៨នេះ ។




ការចាប់ខ្លួននេះ បានធ្វើឡើងបន្ទាប់ពីសមត្ថកិច្ចនៃក្រសួងមហាផ្ទៃ បានស្រាវជ្រាវឃើញថា លោកជាជនសង្ស័យនៅពីក្រោយការស្លាប់របស់លោកស្រី ចេវ សុវឌ្ឍនា កាលពីថ្ងៃទី ២៦ ខែ មករាឆ្នាំ ២០១៨ ។
ទាក់ទងនឹងរឿងនេះដែរ ខាង លោក ឡាយ វណ្ណៈ សារភាពបង្ហោះលើ Facebook របស់លោកថា លោកពិតជាមានការស្រលាញ់គ្នា ជាមួយលោកស្រី ចែវ សុវឌ្ឍនា ពិតប្រាកដមែន តែលោកមិនបានសម្លាប់នាងនោះទេ ។


