ភ្នំពេញៈ តូបជាច្រើន នៅក្នុងផ្សារសន្តិភាព២ ស្ថិតនៅតាមផ្លូវបេតុង៣០ម៉ែត្រ សង្កាត់ចោមចៅ២ ខណ្ឌពោធិ៍សែនជ័យ គេសង្កេតឃើញមានលេងល្បែងស៊ីសងខុសច្បាប់គ្រប់ប្រភេទ រួមមាន៖ ល្បែងលេងបៀអុងឌូ ស៊ីគូទឹក ពិសេសឆ្នោតវៀតណាម។
ជាក់ស្ដែងនៅពេលព្រឹក ផ្សារនេះអាជីវករលក់ម្ហូបអាហារ បន្លែ សាច់ សម្លៀកបំពាក់ជាធម្មតា លុះដល់ពេលរសៀល ស្ទើរតែគ្រប់តូបនៅជួរខាងក្រៅតូបនីមួយៗ បានបើកកត់កឆ្នោតវៀតណាម ដោយមិនខ្លាចក្រែងសមត្ថកិច្ចឡើយ ហើយអ្នកកត់កន្ទុយលេខទាំងនេះ បានបង្ហើបថា ពួកគាត់ទទួលកត់ឲ្យមេឆ្នោតឈ្មោះ លីន ។ ពួកគាត់ បានអះអាងទៀតថា មេឆ្នោតនេះ តម្រូវឲ្យកត់ម៉ាសេរី កុំភិតភ័យខ្លាចសមត្ថកិច្ចឲ្យសោះ មេឆ្នោតធានា ទាំងផ្លូវច្បាប់ ទាំងអាជ្ញាធរគ្រប់ជាន់ថ្នាក់។
អធិការនគរបាលខណ្ឌពោធិ៍សែនជ័យ លោក យឹម សារ៉ាន់ បានឲ្យដឹងថា ទីតាំងកន្ទុយលេខនៅផ្សារសន្តិភាព២ លោកបានដឹងហើយថា ជារបស់លោក លីន ។ លោកថា លោកមិនរាថយទេ ចំពោះល្បែងស៊ីសងខុសច្បាប់ ហើយគេ អាងសម្បើមណាស់។
អភិបាលខណ្ឌពោធិ៍សែនជ័យ លោក ហែម ដារិទិ្ធ បានបញ្ជាក់យ៉ាងច្បាស់តាមទូរស័ព្ទថា លោកមិនខ្វាយខ្វល់ចំពោះអ្នកណាអាងខ្នង អាងខ្សែហោរទេ លោកមិនខ្លាចទេ ឲ្យតែអ្នកនោះឯងរកស៊ីខុសច្បាប់ ត្រូវតែបង្ក្រាប។ លោកមិនកំណត់ពេលណា ថ្ងៃណានោះទេ ឲ្យតែអាជ្ញាធរទទួលបានព័ត៌មាន ជុំវិញរឿងអ្វីដែលខុសច្បាប់ មិនថា តែល្បែងស៊ីសងប៉ុណ្ណោះទេ គឺកម្លាំងរបស់គណៈបញ្ជាការឯកភាពរដ្ឋបាលខណ្ឌ នៅប្រចាំការរហូត មានទាំងសមត្ថកិច្ចប៉េអឹម នគរបាលខណ្ឌ និងប្រជាការពារ រង់ចាំទទួលបញ្ជាដឹកនាំរហូត។
គួរបញ្ជាក់ថា ផ្សារសន្តិភាព២ខាងលើនេះ កាលពីមុនស្ថិតនៅក្រោមការគ្រប់គ្រងខណ្ឌដង្កោ សង្កាត់ពងទឹក៕
