ករណីស្លាកយីហោ នៃហាងលក់ដូរ នៅក្រុងប៉ោយប៉ែត ដែលសរសេរអក្សរចិន, ថៃ ធំៗលើអក្សរខ្មែរ ហើយកន្លែងខ្លះមិនមានទាំងសរសេរអក្សរខ្មែរនោះ បង្កការរិះគន់យ៉ាងខ្លាំង ដោយចាត់ទុកការសរសេរអក្សរបរទេស លើបូរណភាពទឹកដីកម្ពុជាបែបនេះ ថាជាការមើលងាយ វាយបន្ថោកតម្លៃខ្មែរខ្លួនឯង ខណៈខាងមន្ត្រីក៍បានប្រតិកម្មថា ករណីនេះមន្ត្រីបានចុះអប់រំ និងណែនាំរួចហើយ មួយដងជា ០២ដង តែម្ចាស់ដាក់ស្លាកយឺហោទាំងនោះ មិនស្តាប់ និងមិនអនុវត្តតាមឡើយ។
ស្លាកទាំងនោះ មានដូចជា ហាងអាហារ ហាងកាហ្វេ ហាងអ៊ីនធឺណែត បៀរហ្គាដិន ផ្ទះសំណាក់ សណ្ឋាគារ ... ទាំងនោះស្ថិតនៅ «តំបន់ប្លុកកាស៊ីណូ និងតាមមាត់អូរព្រំដែនកម្ពុជា ថៃ » ស្ថិតភូមិក្បាលស្ពាន០១ នៅម្តុំផ្លូវផ្សារដើមពុទ្រា និងជិតផ្សារប៉ោយប៉ែតថ្មី ឬផ្សារអគ្គ និងនៅផ្លូវជាតិលេខ៥ ក្នុងភូមិបាលីលេយ្យ១ បាលីលេយ្យ២ ភូមិប៉ោយប៉ែតនៃសង្កាត់-ក្រុងប៉ោយប៉ែត។
ករណីសរសេរជាអក្សរចិន, ថៃ និងអត់អក្សរខ្មែរ ឬមានដែរ តែនៅពីក្រោម និងតូចជាងនៅតំបន់ប៉ោយប៉ែតនោះ ប្រជាជន និងអាជ្ញាធរមិនគាំទ្រឡើយ សង្ឃឹមក្រោយការរិះគន់ និងការចែករំលែករបស់ពុកម៉ែបងប្អូនរួច នឹងមានវិធានការពីថ្នាក់លើ ៕
