កោះកុងៈ យ៉ាងហោចណាស់មនុស្ស៦នាក់ និងឆ្កែ៣ក្បាល ត្រូវរន្ទះបាញ់ស្លាប់ កាលពីវេលាម៉ោង៣រសៀល ថ្ងៃព្រហស្បតិ៍ ៣កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៧ ខែឧសភា ឆ្នាំ២០១៨ ខណៈក្រុមជនរងគ្រោះនាំគ្នាទៅជួយលើកផ្ទះសង់ថ្មី នៅចំណុចអូរទាពង ស្ថិតក្នុងភូមិប្រឡាយ ឃុំប្រឡាយ ស្រុកថ្មបាំង ខេត្តកោះកុង ។
សមត្ថកិច្ចស្រុកថ្មបាំងបានឲ្យដឹងថា កាលពីវេលាខាងលើ គ្រោះធម្មជាតិរន្ទះបាញ់បានបាញ់សម្លាប់មនុស្ស៤នាក់ ទី១-ឈ្មោះ សៀម សាវឿន ទី២-ឈ្មោះ សៀម សឿន ទី៣-ឈ្មោះ ទិល សារុណ ភេទប្រុស អាយុ៣៧ឆ្នាំ (ត្រូវជាប្តីរបស់ សេម សាវឿន) ទី៤-ឈ្មោះ ផាន់ វ៉ាធី ភេទប្រុស អាយុ៤ឆ្នាំ។ អ្នកទាំងបួននាក់នេះ រស់នៅភូមិច្រកឫស្សី ឃុំជំនាប់ ស្រុកថ្មបាំង ខេត្តកោះកុង។ ចំណែកទី៥-ឈ្មោះ ភិន ភឿន ភេទប្រុស អាយុ២៦ឆ្នាំ មានទីលំនៅភូមិប្រឡាយ ឃុំប្រឡាយ ស្រុកថ្មបាំង និងទី៦-ឈ្មោះ ធឿន ចាន់ថា ភេទស្រី អាយុ១៤ឆ្នាំ មានទីលំនៅភូមិច្រកឫស្សី ឃុំជំនាប់ ស្រុកថ្មបាំង ខេត្តកោះកុង។ ជាមួយគ្នានោះ បណ្តាលឲ្យសត្វឆ្កែ៣ក្បាលងាប់ផងដែរ។
គួរបញ្ជាក់ថា អ្នកដែលស្លាប់ទាំង៦នាក់នោះ មាន២នាក់ជាប្តីប្រពន្ធ និង៤នាក់ទៀតជាគ្រួសារផ្សេងៗគ្នា។
ពាក់ព័ន្ធនឹងករណីគ្រោះធម្មជាតិនេះផងដែរ សូមបងប្អូនប្រជាពលរដ្ឋមានការប្រុងប្រយ័ន្នឲ្យបានខ្ពស់ជៀសវាងគ្រោះថ្នាក់ជាយថាហេតុ៕
