លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត គ.ជ.ប បានថ្លែងថា៖ ពិតណាស់ការធ្វើយុទ្ធនាការ «ដេកផ្ទះ ឈ្នះឯង» និងយុទ្ធនាការ «ខ្ញុំទៅបោះឆ្នោត ព្រោះខ្ញុំស្រលាញ់ប្រទេសខ្ញុំ» នេះ គឺជាការបង្ហាញក្តីស្មោះស្ម័គ្ររបស់អ្នកគាំទ្រ ទៅកាន់គណបក្សនយោបាយ ប៉ុន្តែវាក៏អាស្រ័យលើច្បាប់ដែរ។ ប្រធានគណៈកម្មាធិការជាតិរៀបចំការបោះឆ្នោតរូបនេះ បាននិយាយថា ការធ្វើយុទ្ធនាការអ្វីមួយ គឺជាសិទ្ធិរបស់ប្រជាពលរដ្ឋ ប៉ុន្តែក៏មិនត្រូវឲ្យខុសពីច្បាប់ឡើយ។
លោកប្រធាន គ.ជ.ប ពន្យល់ថា យុទ្ធនាការជំរុញពលរដ្ឋឲ្យទៅបោះឆ្នោត គឺត្រឹមត្រូវតាមច្បាប់ដែលបានធានាស្រាប់ រីឯយុទ្ធនាការ «ដេកផ្ទះ ឈ្នះឯង» ហាមពលរដ្ឋបោះឆ្នោត គឺផ្ទុយពីច្បាប់ដែរបានចែង។
ការបោះឆ្នោតជ្រើសរើសតំណាងរាស្ត្រនីតិកាលទី៦ខិតជិតមកដល់ ហើយ គ.ជ.បបានទទួស្គាល់គណបក្សនយោបាយ២០ ដោយអវត្តមានអតីគណបក្សសង្គ្រោះជាតិ។ អ្នកប្រើប្រាស់បណ្តាញសង្គមហ្វេសប៊ុក បានធ្វើយុទ្ធនាការប្រឆាំងគ្នាទៅវិញទៅមក ដើម្បីបង្ហាញអារម្មណ៍ពេញចិត្ត និងមិនពេញចិត្ត ចំពោះដំណើរការបោះឆ្នោត ដែលនិន្នាការផ្សេងគ្នា។ ពលរដ្ឋគាំទ្រអតីតគណបក្សសង្គ្រោះជាតិ ផ្ដើមធ្វើយុទ្ធនាការ«ដេកផ្ទះ ឈ្នះឯង» ចំណែករីឯអ្នកគាំទ្រគណបក្សប្រជាជនកម្ពុជា ធ្វើយុទ្ធនាការ «ខ្ញុំទៅបោះឆ្នោត ព្រោះខ្ញុំស្រលាញ់ប្រទេសខ្ញុំ»។
សូមរំលឹកថា កាលពីថ្មីៗនេះ អ្នកនាំពាក្យក្រសួងយុត្តិធម៌មានព្រមានថា៖ ការជ្រលក់ម្រាមដៃជាមួយទឹកថ្នាំខ្មៅផ្សេងបន្លំថា ខ្លួនបានទៅបោះឆ្នោត គឺជាអំពើល្មើសច្បាប់ព្រហ្មទណ្ឌ ចំណែកឯសម្តេច ហ៊ុន សែន បានមានប្រសាសន៍ថា៖ បើមិនទៅហើយយកទឹកថ្នាំលាបសក់ទៅលាបដៃបន្លំសាធារណជននឹងប្រឈមទោសព្រហ្មទណ្ឌ។