ភ្នំពេញ ៖ នាព្រឹកថ្ងៃទី ២២ ខែ ឧសភា ឆ្នាំ ២០១៨នេះ នាយឧត្តមសេនីយ៍ ជួន សុវណ្ណ អគ្គស្នងការរង និងជាស្នងការនគរបាលរាជធានីភ្នំពេញ បានចេញលិខិតបង្គាប់ ស្តីពី ការផ្អាកការងារបណ្តោះអាសន្ន ដោយបានសម្រេចផ្អាកការងារបណ្តោះអាសន្ន ចំពោះលោកអនុសេនីយ៍ទោ កៅ សំអុល ជាមន្ត្រីប៉ុស្តិ៍នគរបាលរដ្ឋបាល ទួលស្វាយព្រៃទី១ ខណ្ឌចំការមន រាជធានីភ្នំពេញ។
លោកស្នងការលើកឡើងថា ចំពោះមូលហេតុនៃការសម្រេចផ្អាកការងារមន្ត្រីនគរបាល ឋាន្តរស័ក្តិអនុសេនីយ៍ទោនេះ ដោយសារនគរបាលរូននេះ បញ្ចេញអាកប្បកិរិយា ឬពាក្យសម្តីគ្មានសីលធម៌ អមនុស្សធម៌ ខ្វះសុជីវធម៌ ដែលជាហេតុធ្វើឲ្យបាត់បង់កិត្តិយស សេចក្តីថ្លៃថ្នូររបស់នគរបាលជាតិ។
ទោះបីជា លោកអនុសេនីយ៍ទោ កៅ សំអុល ត្រូវបានផ្អាកការងារជាបណ្តោះអាសន្ន តែសាម៉ីខ្លួន ត្រូវមកបង្ហាញមុខនៅការិយាល័យបុគ្គលិក រៀងរាល់ម៉ោងធ្វើការ ដើម្បីកែប្រែកំហុសឆ្លង និងរង់ចាំការសម្រេចជាថ្មី រីឯប្រាក់ខែរបស់ប៉ូលិសនេះ ត្រូវបង្វែ មកបើកជាសាច់ប្រាក់ឲ្យសាម៉ីខ្លួនរៀងរាល់ខែ។
សូមជម្រាបជូនថា នៅល្ងាចថ្ងៃទី២១ ខែឧសភា ឆ្នាំ២០១៨ មន្ត្រីនគរបាលប៉ុស្តិ៍ ដែលទះកំផ្លៀងលើស្ត្រីអ្នកជិះម៉ូតូនោះ ត្រូវបានហៅទៅសាកសួរនៅស្នងការដ្ឋាននគរបាលរាជធានីភ្នំពេញ ហើយមន្ត្រីនគរបាលនោះ បានសុខចិត្តធ្វើលិខិតសុំទោសលើស្ត្រីអ្នកបើកបរម៉ូតូខុសច្បាប់នោះ។
ទាក់ទងនឹងមូលហេតុឈានដល់អំពើហិង្សា បើតាមឃ្លីបវិដេអូ ដែលគេបង្ហោះ បង្ហាញថា ស្ត្រីអ្នកបើកបរម៉ូតូ បានល្មើសច្បាប់ ដោយជិះម៉ូតូបញ្ច្រាសផ្លូវផង និងមិនពាក់មួកសុវត្ថិភាពផង ស្ត្រីនោះ ថែមទាំងជេរប្រមាថសមត្ថកិច្ច និងមិនព្រមចុះពីលើម៉ូតូថែមទៀត។
