Thursday, May 31, 2018

ស៊យធំហ្មង! ឆក់ចំជនរងគ្រោះជើងខ្លាំង ជិះរថយន្តដេញបុកបាក់ជើងចោរ រងរបួសធ្ងន់ធ្ងរ!

អាម៉ាប៉ាប៉ាញ៉ូស

ភ្នំពេញៈ ពិតជាថ្ងៃស៊យហើយ សម្រាប់លោកចោរ២នាក់ ដែលបានធ្វើសកម្មភាពបានសម្រេច តែស៊យជនរងគ្រោះជិះរថយន្តដេញបុក បណ្ដាលឲ្យបាក់ជើង ហើយត្រូវជាប់ខ្នោះទៀត។ ហេតុការណ៍ឆក់នេះ កើតឡើងនៅវេលាម៉ោងប្រហែល៩៖៣០នាទីយប់ ថ្ងៃពុធ ១រោច ខែជេស្ឋ ឆ្នាំច សំរិទ្ធិស័ក ព.ស២៥៦២ ត្រូវនឹងថ្ងៃទី៣០ ខែឧសភា ឆ្នាំ២០១៨ នៅចំណុចមុខផ្ទះលេខ៥៩ ផ្លូវលេខ៦០៦ កែងផ្លូវលេខ៣១៣ ក្រុមទី៣៨ ភូមិ៨ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។

សមត្ថកិច្ចឲ្យដឹងថា ជនសង្ស័យជាចោរឆក់ទាំង២ រួមមាន ១-ឈ្មោះ វ៉ែន ប៉ានលី ហៅ ទូ ភេទប្រុស អាយុ២៤ឆ្នាំ មុខរបរពុំពិតប្រាកដ ស្នាក់នៅផ្ទះជួល ផ្លូវរថភ្លើង សង្កាត់ឫស្សីកែវ រាជធានីភ្នំពេញ (រងរបួស-បាក់ភ្លៅខាងឆ្វេង កំពុងសម្រាកព្យាបាលនៅមន្ទីរពេទ្យព្រះកុសុមៈ និង២-ឈ្មោះ ឡែត ពន្លក ហៅ ខ្មៅ ភេទប្រុស អាយុ៣០ឆ្នាំ មុខរបរ និងទីកន្លែងស្នាក់នៅពុំពិតប្រាកដ។

ចំណែក វត្ថុតាងចាប់យក មានម៉ូតូមួយគ្រឿងម៉ាក Super CVT ពណ៌ខ្មៅ ពាក់ស្លាកលេខ ភ្នំពេញ 1FH-4045, សោទីបលេខ៨ សំប៉ែតកែច្នៃសម្រាប់កាច់កម៉ូតូចំនួន១ (ចាប់យកពីឈ្មោះ ឡែតពន្លក ហៅ ខ្មៅ)។ ជនរងគ្រោះឈ្មោះ សុខ ធី មុខរបររត់តាក់ស៊ី ភេទប្រុស អាយុប្រហែល៣០ឆ្នាំ (ក្រោយកើតហេតុ ពុំបានដាក់ពាក្យបណ្ដឹងទេ ដោយបើករថយន្តចេញទៅបាត់)។

សមត្ថកិច្ចបន្តថា នៅមុនពេលកើតហេតុ ជនរងគ្រោះបានបើករថយន្តមួយគ្រឿងម៉ាក COROLA ពណ៌ទឹកមាស ពុំច្បាស់ស្លាកលេខ តាមបណ្ដោយផ្លូវ៦០៦ លុះពេលមកដល់ចំណុចផ្លូវលេខ៦០៦ កែង៣១៣ កន្លែងកើតហេតុ ពេលនោះជនរងគ្រោះបានយកទូរស័ព្ទដៃមកនិយាយលើរថយន្តបណ្ដើរ បើករថយន្តបណ្ដើរ ស្រាប់តែមានជនសង្ស័យចំនួន២នាក់ខាងលើ បានជិះម៉ូតូមួយគ្រឿងម៉ាក Super CVT ពណ៌ខ្មៅ មកពីក្រោយខាងស្ដាំរបស់ជនរងគ្រោះ ដោយជនសង្ស័យឈ្មោះ វ៉ែន ប៉ានលី ជាអ្នកបើកម៉ូតូ ចំណែកឈ្មោះ ឡែត ពន្លក ហៅ ខ្មៅ ជាអ្នកជិះពីខាងក្រោយ បានជិះមកអែបខាងស្ដាំដៃជនរងគ្រោះ ហើយជនសង្ស័យឈ្មោះ ឡែត ពន្លក បានធ្វើសកម្មភាពឆក់ទូរស័ព្ទដៃពីដៃរបស់ជនរងគ្រោះបានសម្រេច។

ភ្លាមនោះ ជនរងគ្រោះក៏បើករថយន្តតាមពីក្រោយជនសង្ស័យ រួចដេញបំបុកម៉ូតូរបស់ជនសង្ស័យទាំងពីរនាក់ បណ្ដាលឲ្យដួលម៉ូតូ បណ្ដាលឲ្យបាក់ជើងខាងឆ្វេងរបស់ជនសង្ស័យឈ្មោះ វ៉ែន ប៉ានលី។ ភ្លាមៗនោះ ជនរងគ្រោះបានមកយកទូរស័ព្ទពីដៃជនសង្ស័យទាំងពីរនាក់ យកទៅវិញ រួចបើករថយន្តចាកចេញទៅបាត់ទៅ ដោយពុំបានដាក់ពាក្យបណ្ដឹងទេ។ ចំណែកជនសង្ស័យទាំងពីរ ក៏ត្រូវប្រជាពលរដ្ឋនៅក្បែរកន្លែងកើតហេតុ ជួយឃាត់ខ្លួនយកមកប្រគល់ឲ្យសមត្ថកិច្ចនគរបាលប៉ុស្តិ៍រដ្ឋបាលបឹងកក់ទី២ ចាត់ការតាមផ្លូវច្បាប់តែម្ដង។

បច្ចុប្បន្ន ជនសង្ស័យឈ្មោះ  វ៉ែន ប៉ានលី ហៅ ទូ ដោយសារជើងភ្លៅខាងឆ្វេងបាក់ ក៏ត្រូវបានសមត្ថកិច្ចយកទៅសង្គ្រោះបន្ទាន់នៅមន្ទីរពេទ្យព្រះកុសុមៈ។ ចំណែកជនសង្ស័យឈ្មោះ ឡែត ពន្លក ហៅ ខ្មៅ បានបញ្ជូនមកកាន់អធិការដ្ឋាននគរបាលខណ្ឌទួលគោក ដើម្បីធ្វើការសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធីច្បាប់៕

@Amapapa.News

Feature Ads