សៀមរាបៈ នគរបាលខេត្តសៀបរាប បានឲ្យដឹងថា មានករណីផ្ទុះកង់រថយន្ដ បណ្ដាលឲ្យឆាបឆេះស្ទើរទាំងស្រុង នៅវេលាម៉ោង២និង៣០នាទីរំលងអធ្រាត្រថ្ងៃអាទិត្យ ៧រោច ខែពិសាខ ឆ្នាំចសំរឹទ្ធិស័ក ព.ស ២៥៦២ ត្រូវនិងថ្ងៃទី៦ ខែឧសភា ឆ្នាំ២០១៨ ហើយភ្លើងនិងរលត់ទៅវិញទាំងស្រុងនៅវេលាម៉ោង៥ទៀបភ្លឺ។
លោកឧត្ដមសេនីយ៍ត្រី ភឹង សម្បតិ ស្នងការរងទទួលផែនការិល័យ នគរបាលបង្ការ ពន្លត់អគ្គិភ័យ និងសង្គ្រោះ បានឲ្យដឹងថា រថយន្ដភ្លៅ៥ ដឹកអីវ៉ាន់ចាប់ហួយមួយគ្រឿង បានផ្ទុះកង់បណ្ដាលឲ្យឆេះ នៅចំណុចព្រៃកាស្យា ចន្លោះគីឡូម៉ែត្រលេខ ២៥-២៦ លើផ្លូវជាតិលេខ ៦៧ ភូមិសាលាក្រវ៉ាន់ ឃុរំចេក ស្រុកបន្ទាយស្រី ខេត្តសៀមរាប។
លោក បានបញ្ជាក់ថា អ្នកបើកបររថយន្ដឈ្មោះ អឿន សុវណ្ណទីនាង ភេទប្រុស អាយុ៣៤ឆ្នាំ រស់នៅភូមិអូដឹម ឃុំជំពូវ័ន ខណ្ឌពោធិ៍សែនជ័យ រាជធានីភ្នំពេញ។
លោក បានបញ្ជាក់បន្ថែមទៀតថា ករណីអគ្គិភ័យនេះ មានរថយន្ដពន្លត់អគ្គិភ័យ៤គ្រឿងចេញជួយអន្តរាគមន៍ក្នុងនោះមាន៖ ទី១ រថយន្ដស្រុកវ៉ារីន១គ្រឿង ទី២ រថយន្ដស្រុកប្រាសាទបាគង០១គ្រឿង ទី៣ រថយន្តការិយាល័យខេត្ត២គ្រឿង និងប្រើប្រាស់ទឹកអស់ចំនួន៣រថយន្ដ។ ករណីនេះ ពុំបណ្ដាលឲ្យមនុស្សរងរបួស ឬគ្រោះថ្នាក់ឡើយ៕
